Tags-Sher

rauñd Daalā hai zamīn-e-sher se tā-charḳh-e-fikr
rok le 'arsh' ab inān-e-tausan-e-chālāk ko

lafzoñ kā ye ḳhazāna tire naam kab huā
ye sher kab kahe tujhe ilhām kab huā

falak se hañgām-e-sher-goī sadā.eñ paiham ye aa rahī haiñ
ki aaj ai 'josh' nukta-parvar tirā sā jaadū bayāñ nahīñ hai

bujhī hasrat kā nauha hai dil-e-marhūm kā mātam
ba-alfāz-e-digar ye sher-ḳhvānī soz-ḳhvānī hai

'mīr' dariyā hai sune sher zabānī us kī
allāh allāh re tabī.at kī ravānī us kī

udaas lahje meñ kuchh sher haiñ jo rūmānī
unheñ samajhnā ki sab haiñ udhār ke qisse

ġhazal aisī kāmil-e-vazn sun mutafā.ilun mutafā.ilun
hai 'nasīm' tāqat-e-hosh sun koī sher aur sunā.iye

gulshan-e-fikr pe 'anvar' hai girāñ-bār mizāj
sher kī bārish-e-ilhām ilāhī tauba

paḌheñge sher ro ro log baiThe
rahegā der tak mātam hamārā

ishqiya kahe sher o yā mad.h-o-manāqib
aalam kā banvāḌā kahe shā.ir nahīñ hai bhaaT

shumāriyāt bhī 'shāhīn' sher-goī bhī
ye harf harf nagīna baḌā karishma hai

zindagī kā mas.ala kuchh aur hai
sher kah letā huuñ āsānī ke saath

sher-e-rañgīñ na samjho un ko 'jalīl'
tūti-e-fikr laal ugaltā hai

ham āp-bītī sunāte haiñ saada lafzoñ meñ
ye saare sher hameñ tark-e-fan se aate haiñ

sher likhūñ to kis tarah nazm kahūñ to kyuuñ bhalā
merī zabān chhin ga.ī haath mire katar ga.e

kyā ḳhaak apne dil ko tamannā-e-sher ho
juz ḳhaar kuchh nahīñ chaman-e-rozgār meñ

ai suḳhan-fahm mire sher se kyā lagtā hai
kyā mire ba.ad mujhe yaad rakhā jā.egā

'mus.hafī' sher-e-sāda kahne meñ
vaqt kā apne to fuġhānī hai

kaheñge 'sāqī'-e-sarmast sher-e-tar kyā ham
hamāre hisse meñ aayā hai jaam talchhaT kā

sher kahtā thā ki mazmūn-e-dahan yaad aayā
ik muamma ye dam-e-fikr-e-suḳhan yaad aayā