Tags-Sher

ishq to ab sher kahne kā bahāna rah gayā
harf ko rakhtā huuñ raushan sho.ala-e-afkār se

pariyoñ kī tausīf meñ aise sher 'razā' maiñ likkhūñ
jin ko sun kar uḌtī aa.eñ jhūmeñ nācheñ pariyāñ

har-chand sher o shauq kī buniyād hai junūñ
chaltā nahīñ hai kaam ḳhirad ke baġhair bhī

kitnī mushkil hai kisī sher kī tahlīl 'nasīr'
kitnī dushvār hai ehsās kī gīrā.ī bhī

mushā.ere meñ sunā.ī ham ne jo DheḌh-sau sher kī musaddas
bahut se shā.er to rakkhe rakkhe hī shāmiyāne meñ ghis ga.e haiñ

shāgird ke ab sher se hotā hai barāmad
mazmūn bahut pahle jo ustād ne bāñdhā

asar ke sher meñ husn-o-kashīsh kī hai taujīh
na.ī jihat na sahī zeb-e-dāstān to hai

vahāñ bhī khel meñ no-ball ho to faul hai
yahāñ bhī sher meñ ihmāl ho to faul hai

maiñ apne vāste rasta nayā nikāltā huuñ
dalīl-e-sher meñ thoḌā sā kashf Dāltā huuñ

sher-e-hindī jo sune 'mehr' jigar tafta ke
apnā andāz-e-fasīhān-e-ajam bhuul ga.e

lafz hai kuchh aur ma.anī kuchh har misre meñ fankār hai ġham
aise vaise sher kī lazzat bāhar kuchh aur andar kuchh

'faiz' hotā rahe jo honā hai
sher likhte rahā karo baiThe

baaġh par sher kahne vāloñ kā
ek misra.a harā-bharā nahīñ hai

ḳhulūs-e-fikr kī galiyoñ meñ ghūmte tanhā
ham apne sher kī ābād bastiyoñ meñ rahe

gul-hā-e-rañg-rañg haiñ afkār-e-nau-ba-nau
ye rahguzār-e-sher hai kis gulsitāñ kī raah

har sher se mere tirā paikar nikal aa.e
manzar ko haTā kar pas-e-manzar nikal aa.e

surūr-afzā-o-mastī-ḳhez-o-shorish-āfrīñ hogī
vo bazm-e-sher jis meñ 'vahshat'-e-shevā-bayāñ hogā

darūn-e-dil kī sadā hai magar ġhazal 'māhir'
ki sher sher pe sāme.a haiñ vāh-vā karte

kuchh haqā.eq ko agar maiñ ne kiyā hai be-naqāb
ho ga.e nārāz mujh se sher ke nabbāz kyuuñ

is ishq meñ na pūchho hāl-e-dil-e-darīda
tum ne sunā to hogā vo sher 'mus.hafī' kā