Tags-Sher

ik sher jaane kis ke tasavvur meñ kah diyā
barsoñ pukārtā rahā merā hunar mujhe

lā-valad kahte haiñ ham ko lā-valad
sher se az-bas ki aulādī haiñ ham

fikr kī ye nazākateñ sher kī ye latāfateñ
husn kā ik asar kahūñ ishq kā ik amal kahūñ

sher daulat hai kahāñ kī daulat
maiñ ġhanī huuñ to zabāñ kī daulat

kyuuñ lafz lafz khodte ho sher ko 'kabīr'
shā.ir nikālnā hai ma.ānī ke ba.ad kyā

har sher taḌāqe kā har ik baat tamāshā
aisā to maiñ ne saudā ke dīvān meñ dekhā

kabhī shu.ūr kabhī dil kabhī suḳhan mahke
kaho vo sher ki duniya-e-fikr-o-fan mahke

rahūñ ḳhamosh to phūloñ ko niiñd aa jaa.e
paḌhūñ jo sher to lafzoñ kā bāñkpan mahke

zikr us kā guftugū meñ jo shāmil huā 'adam'
jo sher kah diyā vo parī-ḳhāna ban gayā

ai be-hunar sambhal kar chalnā hai shā.irī meñ
sher-o-suḳhan ke māhir ahbāb dekhte haiñ

ik taḳht-e-ravān-e-sher aayā kuchh shāh-e-suḳhan na farmāyā
phir tāj-e-tarannum pahnāyā aur ġhazloñ meñ tulvā.e ga.e

mujhe dhun ki kākul-e-zindagī jo bikhar ga.ī hai sañvār duuñ
tumheñ ġham ki ishq ke tazkire mire sher-o-fan se chale ga.e

is ko sehl-e-mumtana.a meñ baat aa.egī samajh
'zeb' aise sher to tafsīr ho sakte nahīñ

is zamīñ kī Toh meñ rahnā himāqat hai miyāñ
jis zamīñ pe sher bhī ta.amīr ho sakte nahīñ

kabhī kabhī baḌī mushkil se baat bantī hai
ġhazal kā sher hamesha nahīñ nikaltā hai

tulū-e-nūr hai 'naqqāsh' sher-e-āgāhī
ai vā-e-baḳht isī sher ko zuhūr nahīñ

sher-ḳhvānī pe tirī sab ko gumāñ hai ki 'jalīl'
bazm meñ rūh-e-amīr-usshuarā aa.ī hai

bas-ki us kī zulf ke āshufta haiñ ham ai 'hasan'
sher meñ bhī dhyān hai pechīda mazmūñ kī taraf

ḳhutba tarġhīb-e-halākat kā ravā hai ai dost
sher kahne kī sazā hai mujhe ma.alūm na thā

hotā zafar qarār jo nashtar nahīñ huā
'jāved' dasht-e-sher meñ be-dast-o-pā huuñ maiñ