Tags-Sher

ba-qaul-e-soz 'jur.at' kyā kaheñ ham fikr ko apnī
hamārā sher haigā bāda-e-vahdat kā paimāna

mahfil-e-raqs ho ki sher-o-sharāb
tum nahīñ ho to bazm-e-mātam hai

'beḳhud' to mar miTe jo kahā us ne naaz se
ik sher aa gayā hai hameñ aap kā pasand

rusvā.ī-e-sher-o-ishq ne vo rutba hameñ 'aḳhtar' baḳhshā hai
faḳhr-e-dakan-o-bañgāl haiñ ham nāz-e-avadh-o-panjāb haiñ ham

varaq-e-gul pe sher haiñ mere
baat bhī paat paat merī hai

harf aa aa ke bajāte haiñ mirā darvāza
sher ho ho ke mire dil kī ghuTan khīñchtā hai

aap se mujh ko milī hai daad ab
ya.anī pichhle sher saare mustarad

tirā sher 'joshish' tujhe hai pasand
tū muhtāj hai kis kī tā.īd kā

ye udāsiyoñ kā jo rañg hai koī ho na ho mire sañg hai
mire sher meñ mirī baat meñ mirī ādatoñ meñ sifāt meñ

sau sher ek jalse meñ kahte the ham 'amīr'
jab tak na sher kahne kā ham ko shu.ūr thā

'kaif' kabhī ik sher meñ Dhalnā hotā hai dushvār
aur kabhī ḳhud ban jaate haiñ afsāne alfāz

sher-o-suḳhan ke mai-ḳhāne kā maiñ huuñ ik mai-ḳhvār
mere liye baada hai taḳhayyul paimāne alfāz

sipar banātā huuñ lafzoñ ko sher meñ lekin
qalam ko apne maiñ shamshīr kartā rahtā huuñ

qadr-shanās-e-sher-o-suḳhan hote haiñ jahāñ par ai 'tābish'
us mahfil meñ sher sunānā kitnā achchhā lagtā hai

daraḳht kaise baḌhegā agar na paanī de
kisī ko paḌh jo tire sher ko ravānī de

kabhī tum nayā koī zaḳhm do ki sunā sakūñ
abhī sher ġham kī samā.atoñ ke asiir haiñ

hamī sher likhte haiñ tīr-o-neza kī nok par
hamī sar-phire haiñ baġhāvatoñ ke asiir haiñ

sher hotā hai ab mahīnoñ meñ
zindagī Dhal ga.ī mashīnoñ meñ

kyuuñ mirā naam mire sher likhe haiñ in meñ
chuġhliyāñ kartī haiñ mujh se ye kitābeñ terī

sher to roz hī kahte haiñ ġhazal ke lekin
aa kabhī baiTh ke tujh se kareñ bāteñ terī