Tags-Sher

sher meñ aa gayā hai ab ilhām
laao 'nātiq' likheñ sapāk-o-amāk

ik ḳhvāb hai vo ḳhvāb to puurā karo 'sāhil'
ik sher mirā mujh ko sunāo ki chalā maiñ

sher-e-tāza hai tohfa-e-shā.er
mushk-e-nāfa hiran ne uglā hai

maiñ milātā huuñ sher-o-ātish ko
fan mujhe kīmiyā kā aatā hai

sher to ham ne bahut Thiik kiyā thā magar
ab bhī ġhalat thā kahīñ ab bhī barābar na thā

kho diyā shohrat ne apnī sher-ḳhvānī kā mazā
daad mil jaatī hai 'nātiq' har ratab-yābis ke ba.ad

bāzār-e-suḳhan garm kiyā us kī sifat suuñ
mujh sher kā haihāt ḳharīdār na aayā

daad kyā kyā na harīfoñ se mujhe miltī rahī
haañ magar jī na lagā sher sunāne meñ mirā

vo ishq jo ham se ruuTh gayā ab us kā haal batā.eñ kyā
koī mehr nahīñ koī qahr nahīñ phir sachchā sher sunā.eñ kyā

sher-o-fan us kā hai mamnūn dabī aahoñ meñ
apne ġham se mirī ġhazloñ ko sajātā hī rahā

har ek sher meñ mazmūn-e-girya hai mere
mirī tarah se koī 'zauq' sher-e-tar to kahe

phir isī rah se milegī na.e iblāġh ko samt
sher ko dard kā uslūb-e-bayāñ hī rakhnā

sher bhī likhtā huuñ aur ghar bhī chalātā huuñ janāb
kab kisī bojh ke shākī mire shāne hue haiñ

'nasīm' achchhī ġhazal par daad deñge ahl-e-dil dil se
utar jā.egā dil meñ sher jo bhī dil se niklegā

nasr meñ jo kuchh kah nahīñ saktā sher meñ kahtā huuñ
is mushkil meñ bhī mujh ko āsānī hotī hai

vo nazm jo maiñ ne tum pe likhī
vo sher jo maiñ ne palkoñ se

us ke hoñToñ kā kiyā jab zikr mere sher ne
har samā.at ke laboñ se jā lagā labrez jaam

yuuñ banā dete the jaise sher ho jaate haiñ ab
harf-e-kun kā bhī kabhī dast-e-hunar hote the ham

sher dilkash ho agar saf.ha-e-kāġhaz pe 'azīz'
ik muraqqa.a hai kamāl-e-suḳhan-ārā.ī kā

laakh chhupte phireñ harfoñ meñ simaTte jaa.eñ
sher uftād haiñ uḌ uḌ ke lipaTte jaa.eñ