Tags-Shikwa

kyā satā.e nahīñ jaate haiñ va-lekin chup haiñ
shikva karnā tirā ai rashk-e-qamar chhoḌ diyā

ahbāb kā shikva kyā kījiye ḳhud zāhir o bātin ek nahīñ
lab uupar uupar hañste haiñ dil andar andar rotā hai

kuchh aur nahīñ shikva shikāyat hī karo tum
is bujhtī mohabbat ko havā kyoñ nahīñ dete

shikva-ālūd nasīhat nahīñ achchhī nāseh
aap haiñ kushta-e-bedād-e-sitamgār ki ham

apne dukhoñ kā ham ne tamāsha nahīñ kiyā
faaqe kiye magar kabhī shikva nahīñ kiyā

shikoh-e-baḳht pe masrūr shaḳhs ko āḳhir
kisī faqīr ke qadmoñ meñ Daal degā vo

merī āñkhoñ ne tujhe dekh ke vo kuchh dekhā
ki zabān-e-mizha par shikva hai bīnā.ī kā

be-mehnat jab roTī qaidī ban jaatī hai thālī kī
be-ġhairat sī rāteñ mujh se shikva kartī rahtī haiñ

Thukrā.eñ yā navāz leñ vo ham ko ai 'fanā'
shikva kabhī kareñge na apnī zabāñ se ham

shikva sā ik darīcha ho nashsha sā ik sukūt
ho shaam ik sharāb sī aur laḌkhaḌā.ūñ maiñ

'ġhālib' kī ġhazleñ paḌhte haiñ 'zauq' se shikva karte haiñ
'saudā' aur 'dabīr' ko takte takte thak kar so jaate haiñ

hameñ ab tak tirī kuchh bhī na kahne vaalī āñkhoñ se ye shikva hai
jo kamsin ḳhvāb in āñkhoñ meñ manzar kāḌhte the

shikva zabāñ pe laa.eñ vo insāñ nahīñ haiñ ham
tere sitam-ba-ḳhair pareshāñ nahīñ haiñ ham

ab daar se miltā hai tirā qāmat-e-bālā
shikva thā tire qad ko bahut sarv-o-saman se

ham bhī apne nahīñ rahe ai dil
kis se shikva kareñ zamāne kā

shikva karte ho ḳhushī tum se manā.ī na ga.ī
ham se ġham bhī to manāyā na gayā ġham kī tarah

ġhairoñ ko ye shikva hai ki piitā hai shab-o-roz
mai-ḳhāne kā muḳhtār to ab tak nahīñ shākī

us sitamgar se shikva kaise ho
aur ulTī mujhe nadāmat hai

shikva na shikāyat hai pechīda bayānī kī
kyuuñ talḳh ye lahja hai kahiye bha.ī urdu meñ

shikva kyā aur kaisī shikāyat āḳhir kuchh buniyād to ho
tum par merā haq hī kyā hai tum Thahre begāne log