Tags-Shikwa

shikva karūñ maiñ kab tak us apne mehrbāñ kā
al-qissa rafta rafta dushman huā hai jaañ kā

koī shikva to zer-e-lab hogā
kuchh ḳhamoshī kā bhī sabab hogā

ab kisī dost se koī shikva nahīñ
vaqt ke saath sab zaḳhm bharne lage

shikva nahīñ duniyā ke sanam-hā-e-girāñ kā
afsos ki kuchh phuul tumhāre bhī mile haiñ

ham jaur-o-sitam sah ke bhī shikva nahīñ karte
aur morid-e-ilzām haiñ ilzām se pahle

guzārne the yahī chaar din guzār diye
na koī rañj na shikva na ab malāl koī

mai-ḳhāne meñ shikva hai bahut tīra-shabī kā
mai-ḳhāne meñ bā-dīda-e-tar kyuuñ nahīñ jaate

zindagī tujh se hameñ ab koī shikva hī nahīñ
ab to vo haal hai jiine kī tamannā hī nahīñ

kareñ 'irfān' ab ham kis se shikva
vo paapā ke bahut hī sar-chaḌhe haiñ

nā-tavāñ kā bhalā kis muñh se maiñ shikva karūñ
ḳhaal hai yaañ mahr ḳhāmosh lab-e-guftār par

shikva america se ḳhākam-ba-dahan hai mujh ko
chūñki is mulk kā sahrā bhī chaman hai mujh ko

mire āñsuoñ pe nazar na kar mirā shikva sun ke ḳhafā na ho
use zindagī kā bhī haq nahīñ jise dard-e-ishq milā na ho

rahzan agar hai ghaat meñ kyā shikva ham-safīr
ḳhud apne rāhbar hī adū kārvāñ ke haiñ

taqdīr kā shikva be-ma.anī jiinā hī tujhe manzūr nahīñ
aap apnā muqaddar ban na sake itnā to koī majbūr nahīñ

jo shikva karte haiñ 'hashamī' se kam-numā.ī kā
unheñ bhī Dar hai zamāne kī kaj-adā.ī kā

dil-e-barham kī ḳhātir mudda.ā kuchh bhī nahīñ hotā
ajab hālat hai ab shikva gilā kuchh bhī nahīñ hotā

tum ise shikva samajh kar kis liye sharmā ga.e
muddatoñ ke ba.ad dekhā thā to aañsū aa ga.e

kis se be-dardī-e-ahbāb kā shikva kiije
naam be-tābī-e-dil kā ḳhafaqāñ rakhte haiñ

kyā taqdīr kā shikva yaaro apnī apnī qismat hai
apnā haath gayā hai aksar TuuTe se paimānoñ par

nahīñ shikva mujhe kuchh bevafā.ī kā tirī hargiz
gilā tab ho agar tū ne kisī se bhī nibhā.ī ho