Tags-Shikwa

mahshar meñ jā-e-shikva kiyā shukr yaar kā
jo bhūlnā thā mujh ko vahī yaad rah gayā

ham ne shikva kabhī kiyā na kareñ
shikva hai e'tirāf nākāmī

mamnūñ hī rahā us but-e-kāfir kī jafā kā
shikva na kiyā dil ne kabhū shukr ḳhudā kā

kareñ ġhair kā shikva kis taur phir ham
na apne sivā jab koī ġhair hove

na samjho tum mirī arz-e-niyāz ko shikva
maiñ jāntā huuñ taqāzā-e-bandagī kyā hai

ham dekh chuke haañ dekh chuke dastūr tumhārī mahfil kā
jab shukr pe ye pābandī hai phir jur.at-e-shikva kaun kare

shikva karne kī ḳhū na thī apnī
par tabī.at hī kuchh bhar aa.ī aaj

vaañ ta.ana tīr-e-yār yahāñ shikva zaḳhm-rez
bāham thī kis maze kī laḌā.ī tamām shab

us kā shikva nahīñ kar sakte ki vo dil ke ta.iiñ
ḳhush nahīñ kartā to barham bhī nahīñ kartā hai

shikva kiyā jo ham ne gaalī kā aaj us se
shikve ke saath us ne ik aur bhī sunā.ī

dekheñ ab kis kā parda uTThegā
harf-e-shikva sar-e-zabāñ aayā

javāñ-lāshe pe haiñ shikva-ba-lab kāñdhe za.īfī ke
agar vo chāhtā ye hādisa hone nahīñ detā

shikva hameñ kuchh nahīñ falak se
tū ne ai maah ham ko maarā

dil meñ nahīñ ḳhuub mail rakhnā
jo shikva gila ho barmalā ho

mahshar bhī koī dard hai jo uTh ke rah gayā
shikva bhī koī ġham hai jo dil meñ nihāñ rahā

tevar-e-dariyā kā shikva hai na tūfāñ kā gilā
merī parvāreñ ḳhafā thiiñ bādbāñ bad-ḳhvāh thā

auroñ kī sard-mehrī kā shikva bajā 'sahar'
ḳhud apne dil ko pyaar se bharnā bhī sīkhiye

ġhair kā shikva kyūñkar rahtā dil meñ jab ummīdeñ thiiñ
apnā phir bhī apnā thā begāna phir begāna thā

zindagī ko nā-murādī se koī shikva nahīñ
ab agar patthar se Takrā.ūñ to sar phahTtā nahīñ

dil hī to hai nigāh-e-karam se pighal gayā
shikva laboñ pe aa ke tabassum meñ Dhal gayā