Tags-Shikwa

kaash pūchho to kuchh batā.eñ ham
hāsil-e-shikva haa.e bāham kyā

jashn kar merī tabāhī par koī shikva nahīñ
bas tirī auqāt se taklīf hotī hai mujhe

log rakhte haiñ diloñ meñ ātish-e-buġhz-o-hasad
aur phir karte haiñ shikva jal rahā hai tan badan

maiñ to ye soch bhī nahīñ saktā
koī shikva zabāñ se guzregā

ġharaz ab shikva kab talak kiije
chup hī rahnā hai 'hātim' ab darkār

ḳhatm hone ko hai qissa-e-zindagī ab hameñ aap se koī shikva nahīñ
Tal na jaa.e kahīñ maut aa.ī huī pursish-e-ġham kī zahmat na farmā.iye

ek vahshat sī rahī tujh se bichhaḌ kar dil meñ
lab-e-sākit se magar koī bhī shikva na huā

kaisā shikva kaisī shikāyat dil meñ yahī socho 'jāved'
tum hī ga.e the us kī galī meñ vo kab tum tak aayā thā

kuchh shikva nahīñ itnā sun le ai mast-e-sitam nāvak-afgan
dil hī na rahegā jab merā phir terā ye paikāñ kyā hogā

nukta-chīnī to fitrat hai insān kī kis kā shikva kareñ kis ko ilzām deñ
ḳhud hamīñ kaun se pārsāoñ meñ haiñ ham ko duniyā se koī shikāyat nahīñ

mujhe is baat kā shikva nahīñ hai
ki jo merā thā ab merā nahīñ hai

tujh se shikva bhī agar ho to koī baat bhī ho
aa.ina chhoḌ ke mujh ko koī samjhā hī nahīñ

zindagī naam tanaffus kā nahīñ hai jānāñ
shikva be-jā hai ki bin tere bhī maiñ zinda huuñ

umr guzrī hai kāmrānī se
koī shikva nahīñ javānī se

tum se mujh ko shikva kyuuñ ho āḳhir baasī phūloñ ko
kaun gale kā haar banā.e kaun aisā dīvāna hai

mirī taqdīr shikva-sanj daur-e-āsmāñ kyuuñ ho
mile jab dard meñ lazzat talāsh-e-mehrbāñ kyuuñ ho

itne shāista-e-ādāb-e-mohabbat na bano
shikva aatā hai agar dil meñ to shikva bhī karo

jo kuchh kiyā so ham ne kiyā apnī chaah se
ab shikva kījiye na kuchh us rashk-e-māh se

shikva manzūr nahīñ tazkira-e-ishq na chheḌ
ki vo dar-parda mirā hāl-e-pareshāñ niklā

shikva us but ke jafā kā jo kiyā maiñ to kahā
tum to duniyā meñ ho ik ahl-e-vafā tum ko kyā