Tags-Shikwa

kuchh arz-e-tamannā meñ shikva na sitam kā thā
maiñ ne to kahā kyā thā aur aap ne kyā jaanā

shikva sayyād kā bejā hai qafas meñ bulbul
yaañ tujhe aap tirā tarz-e-fuġhāñ laayā hai

apnī tanhā.ī kā shikva tujh ko giroh-e-ġhair se kyuuñ
ye to havas kā daur hai pyāre jis ko jis se kaam huā

ham un se aaj kā shikva kareñge
ukhāḌeñge vo barsoñ kī gaḌī baat

kis se kartī maiñ dhuup kā shikva
merā sūraj hī sā.ebān bhī thā

ai ki shikva thā tujhe sañgīñ-mizājī kā mirī
dekh is patthar meñ bhī mauj-e-sharār-e-naġhma hai

milnā-jalnā rasm hī Thahrā phir kyā shikva-shikāyat
taaza zaḳhm koī de jaao chhoḌo baat purānī

lab par ho shikva-rez tabassum bujhā huā
dil meñ magar kisī kī mohabbat sivā rahe

shān-o-shikoh kyā hue qaisar-o-jam kidhar ga.e
taḳht ulaT ulaT ga.e taaj bikhar bikhar ga.e

zabt kī had se guzar kar bhī duā kartā huuñ
shikva-bar-lab huuñ magar jazba-e-tāmīr ke saath

na shikva shikāyat na harf-o-hikāyat
kaho 'mīr' jī aaj kyuuñ ho ḳhafā se

apnī barbādī kā shikva bhī karūñ to kis se
āḳhir is dil ne bhī ye din to dikhānā thā mujhe

zarā shikva kiyā thā aaj un se
are ulTī nadāmat dekh lī hai

mujh ko junūñ se apne shikva jo hai to ye hai
merī mohabbatoñ ko afsāna kar diyā hai

yaad aatī hai 'sabā' be-vatnoñ kī kis ko
mujh ko yārān-e-vatan se koī shikva bhī nahīñ

nākām hī dil jo rahnā thā nākām rahā achchhā hī huā
ab kiije kisī kā shikva kyā jo kuchh bhī huā achchhā hī huā

ġhairat-e-raqīb kā shikva kar rahe ho tum
is muāmle meñ saḳht hai mizāj kyā karūñ

shikva to ek chheḌ hai lekin haqīqatan
terā sitam bhī terī ināyat se kam nahīñ

dil ki thā ḳhush-fahm āgāh-e-haqīqat ho gayā
shukr bhejeñ yā tirī bedād kā shikva kareñ

tere aane kī ḳhabar pā ke abhī se dil ne
shikve ko aur kisī din pe uThā rakkhā hai