Tags-Shikwa

be-dimāġhī shikva-sañj-e-rashk-e-ham-dīgar nahīñ
yaar terā jām-e-mai ḳhamyāza merā āshnā

shikva-sañj-e-rashk-e-ham-dīgar na rahnā chāhiye
merā zaanū monis aur ā.īna terā āshnā

shikva zabāñ pe phuul se ahbāb kā ġhalat
ai dost mujh ko to gila-e-ḳhār bhī nahīñ

us sitamgar kā kyā kareñ shikva
o re dil sab qusūr hai terā

'hamīd' shām-e-ġharībāñ kā kis liye shikva
vo dekh jānib-e-manzil charāġh jalne lage

vo kareñ bhī to kin alfāz meñ terā shikva
jin ko terī nigah-e-lutf ne barbād kiyā

adū ham se tumhāre zulm kā shikva nahīñ karte
dikhāte haiñ ki dekho ham bhī rakhte haiñ jigar itnā

jafā.eñ us kī vo maqbūl-e-ām haiñ itnī
hamārā shikva bahut be-javāz lagtā hai

kiyā thā maiñ ne shikva aap ne āñkheñ jhukā lī thiiñ
huī muddat magar ab tak pashemānī nahīñ jaatī

koī shikva nahīñ ham ko kisī se
ḳhud apnī zaat ham ko chhal rahī hai

zindagī se to ḳhair shikva thā
muddatoñ maut ne bhī tarsāyā

un se nahīñ kuchh shikva ham ko un se nahīñ kuchh rañj-o-malāl
kis se ai dil ishq kiyā kis se chaah ko bartā hai

apne allāh se ho jab shikva
sab ke allāh ko pukārā kar

hashr ke din kyā kaheñge ye agar aayā ḳhayāl
shikva karnā yaar kā pās-e-vafā se duur hai

logoñ se ab to koī bhī shikva nahīñ hameñ
jab ye falak hī dushman-e-jāñ is qadar huā

ye ik savāl hai shikva nahīñ gila bhī nahīñ
mire ḳhudā tirā lutf-o-atā hai kis ke liye

abhī tahqīq behtar hai ki phir shikva abas hogā
ki mīr-e-kārvāñ vāqif nahīñ ādāb-e-manzil se

us ke shikve se hai asar zāhir
kuchh to kahtī hai āh-o-zārī aaj

ishq meñ shikva kufr hai aur har iltijā harām
toḌ de kāsa-e-murād ishq gadāgarī nahīñ

shikva-sanjī ne ḳhulūs--e-iltijā kam kar diyā
kuchh shikāyat bhī zabāñ par thī munājātoñ ke biich