Tags-Shikwa

tumhārā zikr nahīñ hai tumhārā naam nahīñ
kiyā nasīb kā shikva hazār baar kiyā

shikve mire aur us kā batānā ise ilzām
kuchh tai na huā aur yūñhī biit ga.ī raat

ham apne zaḳhm sabhī ko dikhā nahīñ sakte
jo shikva tum se hai sab ko sunā nahīñ sakte

un ko mohabbat hī meñ shak paḌ gayā
Dar se jo shikva na adū kā kiyā

shikva-ba-lab vo riñd haiñ saaqī aaj bhī tere maiḳhāne meñ
tishna-dahan baiThe haiñ lekin arz-e-talab bebāk nahīñ hai

shikva na kareñ ham bhī bharpūr tavajjoh kā
dekhā na karo tum bhī har zaḳhm kī gahrā.ī

use ye shikva ki maiñ ne na pūchhā haal us kā
mujhe ye ḳhauf meñ bolā to ro na jaa.e kahīñ

jafā-e-ġhair kā shikva thā terā thā kyā zikr
abas ye baat burī tujh ko bad-gumān lagī

koī shikva na ġham na koī yaad
baiThe baiThe bas aañkh bhar aa.ī

be-mehrī-e-zamāna kā shikva fuzūl hai
nikle the ghar se gar to sadā kar ke dekhte

ik sheva taġhāful hai ik ishva tajāhul hai
ġhussa hai bajā terā shikva mirā bejā hai

aisī bhagdaḌ meñ koī paaoñ tale aa.e to shikva na kare
gir gayā maiñ to koī mujh se ri.āyat nahīñ karne vaalā

ye soch kar na 'munavār' ne kuchh kiyā shikva
vafā kī daad kā pahlū bhī hai jafā meñ tirī

laayā nahīñ hunūz naved-e-visāl-e-dost
ham shikva-sanj sustī-e-paik-e-sabā ke haiñ

kaam har zaḳhm ne marham kā kiyā ho jaise
ab kisī se koī shikva na gilā ho jaise

tujh se shikva nahīñ saaqī tirī sahbā ne magar
dushmanī koī nikālī hai mire jaam ke saath

har qadam ḳhaak se dāman ko bachāyā tum ne
phir ye shikva hai ki maiñ rāh-guzāroñ meñ na thā

āshob-e-zamāna se hai Darnā kaisā
buzdil kī tarah shikva hai karnā kaisā

minnat-e-qāsid kaun uThā.e shikva-e-darbāñ kaun kare
nāma-e-shauq ġhazal kī sūrat chhapne ko do aḳhbār ke biich

tamām muddat mirā ye shikva rahā kiran se
ki us ne mujh par nazar na Daalī kabhī gagan se