Tags-Subah

kisī ke vāda-e-fardā par e'tibār to hai
tulū-e-sub.h-e-qayāmat kā intizār to hai

vo un kā vasl meñ ye kah ke muskurā denā
tulū-e-sub.h se pahle hameñ jagā denā

in añdheroñ se pare is shab-e-ġham se aage
ik na.ī sub.h bhī hai shām-e-alam se aage

kabhī kabhī mujhe milne bulandiyoñ se koī
shuā-e-sub.h kī sūrat utar bhī aatā hai

aahoñ ke shole jis jā uThte the 'mīr' se shab
vaañ jā ke sub.h dekhā musht-e-ġhubār paayā

sub.h-e-nau ham to tire saath numāyāñ hoñge
aur hoñge jo halāk-e-shab-e-hijrāñ hoñge

sub.h-e-māyūs-e-gulistāñ kī qasam phir kahiye
bāġhbānoñ ke dimāġhoñ se ḳhalal jā.egā

sub.h likhtī hai tirā naam mirī āñkhoñ meñ
qaid tanhā.ī kī hai shaam merī āñkhoñ meñ

shām-e-abad ko jalva-e-sub.h-e-bahār de
rūdād chheḌ zindagī-e-be-sabāt kī

hai ishq us tabassum-e-jāñ-baḳhsh kā shahīd
rañgīniyāñ liye hai jo sub.h-e-hayāt kī

ḳhvāb dekhā ho jin kī āñkhoñ ne
sub.h-e-nau bas unheñ bulātī hai

raat us kī chashm-e-maigūñ ḳhvāb meñ dekhī thī maiñ
sub.h sote se uThā to sāmne paimāna thā

kuchh bhī nahīñ kahīñ nahīñ ḳhvāb ke iḳhtiyār meñ
raat guzār dī ga.ī sub.h ke intizār meñ

sub.h hote vo binā-gosh aaj yaad aayā mujhe
jo girā dāman pe aañsū gauhar-e-yak-dāna thā

kal shab-e-hijrāñ thī lab par naala bīmārāna thā
shaam se tā sub.h dam-e-bālīñ pe sar yakjā na thā

koī shai nahīñ yahāñ mustaqil ye ajab yahāñ kā nizām hai
kabhī dhuup hai kabhī chhāñv hai kabhī sub.h hai kabhī shaam hai

tujh se mil ke bhī terā intizār rahtā hai
sub.h rū-e-ḳhandāñ se shaam zulf-e-barham tak

nasīm-e-sub.h ne aa kar vo rāgnī chheḌī
har ek phuul ne kāñTe ko jhuk ke pyaar kiyā

TukḌe ka.ī ik dil ke maiñ aapas meñ siye haiñ
phir sub.h talak rone ke asbāb kiye haiñ

raat bhar dhotā huuñ tāroñ kī nadī meñ āñkheñ
tab kahīñ jā ke nazar sub.h kī sūrat aa.e