Tags-Subah

aadmī ko ġhaflat-e-duniyā nahīñ detī najāt
sub.h jo chauñkā huā masrūf isī sāmān meñ

ma.āl-e-bāryābī kyā batā.ūñ muḳhtasar ye hai
ki shām-e-ġham ko bhī sub.h-e-vatan kahnā hī paḌtā hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

malbūs jab havā ne badan se churā liye
doshīzgān-e-sub.h ne chehre chhupā liye

sub.h kā āġhāz thā aur chehre par thī gard-e-shab
phuul kī sūrat shagufta maiñ nahā kar ho gayā

sub.h se karb-o-aziyyat kā ye aalam tauba
dard kuchh aur sivā hotā hai har shaam ke ba.ad

ik na.ī sub.h kā āġhāz hai anjām ke ba.ad
phir vahī silsila-e-ishq hai ilzām ke ba.ad

sub.h-dam surḳh ujālā hai khule paanī meñ
chāñd kī laash kahīñ se bhī ubhar saktī hai

tīrgī meñ sub.h kī tanvīr ban jā.eñge ham
ḳhvāb tum dekhoge aur ta.abīr ban jā.eñge ham

sub.h hote hī ye dīvār-e-siyah ḳhānoñ meñ
ret ke Dher kī mānind utar jā.egī

tā-sub.h karvaTeñ hī badalte raheñge ham
un kā agar ḳhayāl sar-e-shām aa gayā

sub.h tak vaj.h-e-jāñ-kanī thī jo baat
maiñ use shaam hī ko bhuul gayā

sub.h-dam shabnam ko jaane kyā huā
sohbat-e-gul se gurezāñ ho ga.ī

jis kī ḳhushbū se fazāoñ meñ mahak thī shab-bhar
sub.h-dam us kī taraf saañp baḌhā jaatā hai

tujhe yaqīn to shāyad na aa.egā lekin
ye sub.h koī karishma dikhāne vaalī hai

a.asāb pe pahre na biThā sub.h-e-safar hai
TūTegā badan aur qabā tañg karegī

aflāk kī gardish se dam-bhar duniyā meñ hameñ ārām nahīñ
vo din nahīñ vo ab raat nahīñ vo sub.h nahīñ vo shaam nahīñ

sub.h se pahle badan kī dhuup meñ niiñd aa ga.ī
aur kitnā jāgtā maiñ raat kā jaagā huā

uTThā thā muñh chhupā.e hue maiñ hī sub.h ko
jaatā thā maiñ hī raat ko dushman ke saath saath

din nikalte hī vo ḳhvāboñ ke jazīre kyā hue
sub.h kā sūraj mirī āñkheñ churā kar le gayā