Tags-Subah

haañ dikhā de ai tasavvur phir vo sub.h o shaam tū
dauḌ pīchhe kī taraf ai gardish-e-ayyām tū

ai umr-e-rafta luuT ke aa jā bas ek baar
aa jā ki sub.h-o-shām ke tevar badal ga.e

ai intizār-e-sub.h-e-tamannā ye kyā huā
aatā hai ab ḳhayāl bhī terā thakā huā

mahke gesū aariz nauras
shām-e-avadh aur sub.h-e-banaras

sub.h haiñ sajde meñ ham to shaam saaqī ke huzūr
bandagī apnī jagah aur mai-kashī apnī jagah

sub.h-dam maiñ kholtā huuñ qufl jis zindān kā
din Dhale us qaid-ḳhāne meñ palaT aatā huuñ maiñ

ik ham ki ham ko sub.h se hai shaam kī ḳhushī
ik tum ki tum ko shaam kā dhaḌkā sahar se hai

aur uljhāte chale jaate ho mere sub.h-o-shām
jab se tum ko ye shaġhaf gesū ke suljhāne meñ hai

vo havā-ḳhvāh-e-chaman huuñ ki chaman meñ har sub.h
pahle maiñ jaatā thā aur bād-e-sabā mere ba.ad

fikr hai sub.h kī dushman kaisī
raat kī raat ġhazal chāhtī hai

kaun jaane ye kis kī zulfoñ meñ
ho ga.e haiñ asīr-e-sub.h-o-shām

tārīk ho na paa.e kabhī dāman-e-falak
palkoñ se tā-ba-sub.h sitāre jalā.iye

shahr kī gasht meñ haiñ sub.h se saare mansūr
ab to mansūr vahī hai jo sar-e-dār nahīñ

sūraj ko nikalnā hai so niklegā dobārā
ab dekhiye kab Dūbtā hai sub.h kā taarā

sub.h aayā sharāb meñ maḳhmūr
niiñd se uTh ke musmusā saaqī

ba.ad-e-shab-e-visāl na dekhūñ maiñ dāġh-e-hijr
yā-rab charāġh-e-umr bujhā de havā-e-sub.h

kal niiñd meñ charāġh ko nārāz kar diyā
sūraj ne aaj sub.h jagāyā nahīñ mujhe

vaqt ruḳhsat bhī nahīñ aane dī āñkhoñ meñ namī
sub.h-dam tar thā magar phūloñ kā dāman dāman

kyā huā jo sitāre chamakte nahīñ daaġh dil ke farozāñ karo dosto
sub.h-e-ishrat pareshāñ huī so huī shām-e-ġham to na vīrāñ karo dosto

shaam tak sub.h kī nazroñ se utar jaate haiñ
itne samjhautoñ pe jiite haiñ ki mar jaate haiñ