Tags-Subah

shaam tak khīñche liye phirte haiñ is duniyā ke kaam
sub.h tak farsh-e-nadāmat par paḌā rahtā huuñ maiñ

kyā hai insāf ki juuñ sub.h tū hañstā hai hanūz
mar chukā sham.a sā maiñ girya hī karte karte

ruuh kī kaa.ī isī taur se chhaTnā thī so maiñ
sub.h-dam mimbar-o-mehrāb ko chhū kar aayā

jaag uThtī hai tah-e-dāmān-e-shab se sub.h-e-nau
maut kyā hai ziist kī tajdīd hai mere liye

miTtī huī hayāt kyā luTtī huī bahār kyā
ya.anī qarīb-e-sub.h-e-ġham sham.a kā e'tibār kyā

vo havā-ḳhvāh-e-chaman huuñ ki chaman meñ har sub.h
pahle maiñ aatā huuñ aur bād-e-sabā mere ba.ad

ye dhūm-dhām rahī sub.h tak ahā-hā-hā
kisī kī utrī hai jaise barāt koThe par

hotī hī nahīñ sub.h-e-qayāmat bhī numūdār
jāgeñge shab-e-hijr ke bīmār kahāñ tak

hijr kī shaam akelī raat ke ḳhālī dar
sub.h-e-firāq kā zard ujālā tere naam

vo zulf-e-mushk-bū bikhrī huī thī
khulī chorī nasīm-e-sub.h-dam kī

aaj sub.h jab āsmāñ par kaale
ghanere abroñ kā baserā thā

gardish-e-vaqt ne gahnā diye kitne sūraj
sub.h kī god meñ dam toḌte mahtāb mile

pukār ai jars-e-kārvān-e-sub.h-e-tarb
bhaTak rahe haiñ añdheroñ meñ tere saudā.ī

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kaTī shām-e-furqat 'azīz' aah kyūñ-kar
zarā ā.īna sub.h-dam dekhnā thā

sub.h-dam ham se tū na kar takrār
hai hameñ pahle dard-e-sar vaa.iz

hai ye murġh-e-sahar se bhī faa.iq
sub.h uThtā hai peshtar vaa.iz

ye rū-e-daraḳhshāñ ye zulfoñ ke saa.e
ye hañgāma-e-sub.h-o-shām allāh allāh

aage vo jā bhī chuke lutf-e-nazāra bhī gayā
chashm-e-ġhaflat na khulī sub.h kā taarā bhī gayā

jise maiñ ne sub.h samajh liyā kahīñ ye bhī shām-e-alam na ho
mire sar kī aap ne khaa.ī jo kahīñ ye bhī jhūTī qasam na ho