Tags-Subah

tum paas ho agar to barābar hai raat din
kuchh sub.h se ġharaz na hameñ shaam se ġharaz

tire hī naam kī simran hai mujh ko aur tasbīh
tū hī hai vird har ik sub.h-o-shām āshiq kā

har ik shaam kahtī hai phir sub.h hogī
añdhere meñ sūraj nazar aa rahā hai

duur hai sub.h shab-e-ġham ai dil
hai sitāroñ maiñ abhī nuur bahut

shab ghar jo rahā mire vo mehmāñ
thā sub.h ye kis adā se kahnā

khaḌe hue jo sāhil par to dil meñ palkeñ bhiig ga.iiñ
shāyad aañsū chhupe hue hoñ sub.h kī narm havāoñ meñ

sub.h bistar band hai jis meñ lipaT jaate haiñ ham
ik safar ke ba.ad phir khulte haiñ aadhī raat ko

ek ik kar ke sabhī kapḌe badan se gir chuke
sub.h phir ham ye kafan pahnā.eñge jazbāt ko

shaam bhī hai sub.h bhī hai aur din bhī raat bhī
māh-e-tābāñ ab bhī hai mahr-e-daraḳhshāñ ab bhī hai

maiñ sub.h ḳhvāb se jaagā to ye ḳhayāl aayā
jo raat mere barābar thā kyā huā us kā

ye aalam lazzat-e-taḳhlīq kā hai raqs-e-lāfānī
tasavvur-ḳhāna-e-hairat meñ lākhoñ sub.h-o-shām aa.e

kahāñ vo shab ki tire gesuoñ ke saa.e meñ
ḳhayāl-e-sub.h se ham āstīñ bhigo dete

kyā sham.a jalātā hai ki ai daulat-e-shab-e-tāb
kal sub.h kā sūraj to tirī gaat meñ gum hai

ik Dhab pe kabhū vo but-e-ḳhud-kām na paayā
dekhā meñ jo kuchh sub.h use shaam na paayā

ḳhvāb aa.eñ kahāñ se agar āñkheñ hoñ purānī
aur sub.h tak is ḳhauf meñ rah bhī nahīñ sakte

kabhī hañste nahīñ kabhī rote nahīñ kabhī koī gunāh nahīñ karte
hameñ sub.h kahāñ se mile ki kabhī koī raat siyāh nahīñ karte

bahut tavīl shab-e-ġham hai kyā kiyā jaa.e
umīd-e-sub.h bahut kam hai kyā kiyā jaa.e

darūd paḌhte hue us kī diid ko nikleñ
to sub.h phuul bichhā.e sabā hamāre liye

ye rañgīñ sub.h chaman-dar-chaman haiñ khilte phuul
tū aa gayā to hue din bhī ye suhāne se

koī nasīm-e-sub.h se merī taraf se ye kahe
bāġh-e-murād kī mire khil na sakī koī kalī