Tags-Subah

sub.h rañgīn-o-javāñ shaam suhānī māñge
dil-e-betāb ki terī hī kahānī māñge

guzar gayā vo zamāna kahūñ to kis se kahūñ
ḳhayāl dil ko mire sub.h o shaam kis kā thā

sub.h jab ho to 'qamar' misl-e-sabā
phuul rakhne vo sirhāne aa.e

sub.h-e-roz-e-ādam-e-nau hai dhuum machī hai ghar ghar meñ
sāthiyo uTTho subūhī se chalkā.eñ bhar ke ayāġhoñ ko

ye kaisī sub.h huī kaisā ye saverā hai
hamāre ghar meñ abhī tak vahī añdherā hai

jo mirī riyāzat-e-nīm-shab ko 'salīm' sub.h na mil sakī
to phir is ke ma.anī to ye hue ki yahāñ ḳhudā koī aur hai

us din havā-e-sub.h ye kahtī huī ga.ī
yūsuf-miyāñ ke sāñvle beTe meñ kyā nahīñ

vo mere āsmāñ par aḳhtar-e-sub.h-e-qayāmat hai
surayyā-baḳht hai zohra-jabīñ hai māh-e-tal.at hai

ufuq pe sub.h-e-bahārāñ kī aamad aamad hai
fazā meñ surḳh phareroñ ke phuul khilte haiñ

shām-e-sub.h-e-firāq daa.im hai
ab tabī.at bahal ga.ī hogī

vo dam-e-sub.h ġhusl-ḳhāne meñ
mere pahlū se shal ga.ī hogī

use sub.h-e-azal inkār kī jur.at huī kyūñkar
mujhe mālūm kyā vo rāz-dāñ terā hai yā merā

tire jalve se hai dil-e-'arsh' raushan
jo vo sub.h-e-sādiq to ḳhurshīd tū hai

sub.h-e-azal hai kab se mire intizār meñ
jī chāhtā hai tāq-e-abad meñ paḌā rahūñ

ik dam ko chaukūñ shauq se phir so.uuñ sub.h tak
is baat ko zabān hī par lā ke so rahe

tā-sub.h mujh ko maare ḳhushī ke na aa.ī niiñd
ik aisī baat vo mujhe samjhā ke so rahe

ham kyuuñ batā.eñ ham ne bhī kī sub.h jis tarah
shab tum to jāgne kī qasam khā ke so rahe

nasīm-e-sub.h se kyā TūTtā ḳhvāb-e-girāñ apnā
koī nādān bijlī chhū ga.ī hai āshiyāñ apnā

ijz ke ashk bahāte hue shab so gayā maiñ
sub.h uTThā to mire kaam mukammal paḌe the

ḳhud apne ās-pās añdheroñ ko dekh kar
ghabrā uThī hai sub.h-e-bahārāñ kabhī kabhī