Tags-Subah

sub.h hogī to zālim zamāne ke ġham tum pe abr-e-sitam ban ke chhā jā.eñge
fursat-e-bazm-e-shab se ghaḌī-do-ghaḌī baat aapas kī koī karo dosto

ho ga.ī sub.h badalte rahe pahlū shab bhar
ek karvaT pe dil-e-zār ne sone na diyā

sub.h-ḳhezoñ ko bhī maut aa ga.ī kyā hijr kī shab
murġh bole hai na mullā hī azaañ detā hai

muñh meñ jis ke tū shab-e-vasl zabāñ detā hai
sub.h tak maare maze hī ke vo jaañ detā hai

sub.h-e-raushan ne utārī haiñ sitāra āñkheñ
shāḳh-e-shamshād ne gulshan kā darīcha dekhā

sub.h se le kar shaam talak un āñkhoñ ne
apne hī saa.e ko baḌhte dekhā hai

uge jo sub.h kā sūraj to ik machine hai vo
Dhale jo shaam to phir jism kī takān sā hai

sub.h ke saath khulī aañkh to ehsās huā
mere siine meñ koī chiiz thī jo TuuT ga.ī

aalam ke har manzar ko kuchh rañg na.e mil jaate haiñ
kirneñ sub.h kī le jaatī haiñ ruup tirī añgḌā.ī kā

mirī nigāh ne baḳhshī hai husn ko raunaq
nasīm-e-sub.h se phūloñ kā rañg bikhrā hai

mai-kade kī taraf chalā zāhid
sub.h kā bhūlā shaam ghar aayā

tujh se ye uqda khulegā ai nasīm-e-sub.h-dam
ġhunche kī mānind is gulshan meñ kyuuñ dil-gīr huuñ

tire shahr se nikalte hī mizāj-e-dahr lā hī
na vo rabt-e-shabnam-o-gul na vo bād-e-sub.h-gāhī

mirī āvāz ne kitne hī chaman phūñk diye
nāla-e-sub.h-e-bahārī huuñ mire paas na aa

sub.h-e-kāzib kī havā meñ dard thā kitnā 'munīr'
rail kī siiTī bajī to dil lahū se bhar gayā

sub.h hote hī sabhī ne dekhā
koī tā hadd-e-nazar thā mujh meñ

charāġh-e-sub.h kī afsurdagī nahīñ tanhā
kahīñ qarīb yahīñ āftāb-e-shām bhī hai

'shād' in añdheroñ meñ kahkashāñ kī manzil se
raat ke guzarne kī sub.h raah taktī hai

kaisā paiġhām kahāñ se ye sabā laa.ī hai
shāḳh-e-gul sub.h-e-bahārāñ hī meñ murjhā.ī hai

sub.h kā bhūlā shaam ko vāpas ghar aa.e to ġhanīmat hai
jin galiyoñ meñ jā ke na lauTo un galiyoñ meñ jaao kyuuñ