Tags-Subah

sāya-e-qurb meñ mileñ aa vahī donoñ vaqt phir
hoñT pe sub.h jagmagā.e aañkh meñ shaam muskurā.e

lahja ki jaise sub.h kī ḳhushbū azaan de
jī chāhtā hai maiñ tirī āvāz chuum luuñ

balā-e-shām ke saa.e the aur vādi-e-dil
agarche sub.h kā chehra dhulā dhulā sā thā

hargiz mirā vahshī na huā raam kisī kā
vo sub.h ko hai yaar mirā shaam kisī kā

vo sub.h ko is Dar se nahīñ baam par aatā
naama na koī bāñdh de sūraj kī kiran meñ

ai sham.a sub.h hotī hai rotī hai kis liye
thoḌī sī rah ga.ī hai ise bhī guzār de

jaane kis sub.h kī tamannā meñ
rāt-bhar sham.a saañ jalā hai koī

diye se lau nahīñ pindār le kar jā rahī hai
havā ab sub.h ke āsār le kar jā rahī hai

yaad se terī sukūñ yuuñ aa gayā
sub.h dam jaise chaleñ purvā.iyāñ

ye roz o shab ye sub.h o shaam ye bastī ye vīrāna
sabhī bedār haiñ insāñ agar bedār ho jaa.e

merī koshish hai ki sheroñ meñ samo duuñ 'mullā'
sub.h kā hosh bhī dīvāngī-e-shām ke saath

apnī is aaj kī tāqat pe na yuuñ itrāo
mehr uTThā thā har ik sub.h-e-shab-anjām ke saath

us ke ruḳhsār sub.h-e-daraḳhshāñ sahī us kī zulfoñ meñ shām-e-ġharībāñ sahī
dhuup aur chhāñv kī tarah vo ḳhud-nigar sāmne mere aa.e to maiñ kyā karūñ

kyuuñ be-asar hai merī duā sahn-e-sub.h meñ
kyuuñ shab-kade meñ merī fuġhāñ rā.egāñ hai zeb

chashmak us mah kī sī dilkash diid meñ aa.ī nahīñ
go sitāra subah kā bhī aañkh jhapkāne lagā

ai saḳhiyo ai ḳhush-nazro yak guuna karam ḳhairāt karo
na.ara-zanāñ kuchh log phireñ haiñ sub.h se shahr-e-nigār ke biich

charāġh-e-sub.h sahī ham hamāre maslak meñ
ravā nahīñ hai añdheroñ se dostī rakhnā

ai merī maañ mujhe har-pal rahe tumhārā ḳhayāl
tum hī se sub.h mirī merī shaam tum se hai

dayār-e-hijr kī suunī udaas galiyoñ meñ
pukārtā hai koī sub.h-o-shām ishq ba-ḳhair

gardish-e-mehr-o-māh bhī gardish-e-jām ban ga.ī
sub.h na laḌkhaḌā.e kyuuñ shaam na jhuum jaa.e kyuuñ