Tags-Subah

jab liyā ahd shab-e-vasl kahā is ne 'hafīz'
sub.h ko yaad rahegī ye hameñ raat kī baat

yaad piirī meñ kahāñ ab vo javānī kī tarañg
sub.h hote hī hameñ bhuul ga.ī raat kī baat

ye sub.h-o-shām kī mastī ye nashsha-e-shab-o-roz
tire baġhair koī kaif ho mujhe sam hai

añdhere ko añdhere hī kaheñge dekhne vaale
savād-e-shām ko sub.h-e-vatan kah duuñ to kyā hogā

chaman meñ ġhuncha muñh khole hai jab kuchh dil kī kahne ko
nasīm-e-sub.h bhar rakhtī hai bātoñ meñ lagā lipTā

phirte ho baaġh se to pukāre hai andalīb
sub.h-e-bahār-e-gul pe shab-e-tār kar chale

jhūTī bāteñ mujhe yaad aa.iiñ jo us kī shab-e-hijr
sub.h-e-kāzib ko maiñ peshānī-e-qātil samjhā

sub.h ke dard ko rātoñ kī jalan ko bhūleñ
kis ke ghar jaa.eñ ki is va.ada-shikan ko bhūleñ

'qamar' kī sub.h-e-furqat pūchhiye sūraj kī kirnoñ se
sitāre to gavāhī ke liye aa.e nahīñ jaate

'mīr' se bai.at kī hai to 'inshā' miir kī bai.at bhī hai zarūr
shaam ko ro ro sub.h karo ab sub.h ko ro ro shaam karo

sham.a sā jab shaam hī se hai gudāz-e-dil 'ravāñ'
sub.h tak kyā jaane kyā hālat tirī ho jā.egī

tā sub.h gire aañsū aur aañkh nahīñ jhapkī
is baat ke shāhid haiñ Duube hue taare bhī

sub.h se pahle bujh gayā 'tābish'
ek dil hī charāġh-e-ḳhāna thā

tū sub.h-e-bahārāñ kā hasīñ ḳhvāb hai phir bhī
āhista zarā os kī būñdoñ pe chalā kar

jab huī sub.h aa ga.e nāseh
unhīñ hazrat ko dekhtā huuñ maiñ

shab-e-furqat uThā uThā kar sar
sub.h-e-ishrat ko dekhtā huuñ maiñ

kisī sub.h-e-firāq meñ mujhe chhoḌ
kisī shaam malāl meñ mujhe mil

sub.h ho jaa.e to us phuul ko dekhūñ ki jise
maiñ shabistān-e-bahārāñ se uThā laayā huuñ

ġhunchoñ kā vo chaTaknā, phūloñ kā vo mahaknā
panchhī pakheruoñ kā vo sub.h-dam chahaknā