Tags-Subah

har sub.h to ḳhurshīd tire muñh pe chaḌhe hai
aisā na ho ye saada kahīñ jī se utar jaa.e

ai āftāb-e-sub.h idhar bhī koī kiran
muddat se ik ġharīb umīd-e-sahar meñ hai

ujḌī huī bastī kī sub.h o shaam hī kyā
ḳhaak uḌāne vāloñ kā anjām hī kyā

tanvīr-e-numūd-e-sub.h bhī hai aariz ke damakte jalvoñ meñ
zulfoñ ke machalte saa.e meñ tasvīr-e-savād-e-shām bhī hai

jo tere dayār-e-ruḳh-o-kākul meñ na guzre
vo sub.h nahīñ hai vo mirī shaam nahīñ hai

raat ko niiñd nahīñ sub.h ko ārām nahīñ
un ke aane kā hai imkān ḳhudā ḳhair kare

utrā hai merī aañkh meñ bādal kā ik hujūm
har sub.h-o-shām hotī hai barsāt in dinoñ

sub.h-e-sādiq mujhe matlūb hai kis se māñgūñ
tum to bhole ho charāġhoñ se bahal jāoge

panja hai mirā panja-e-ḳhurshīd maiñ har sub.h
maiñ shāna-sifat sāya-e-rū zulf-e-butāñ huuñ

ab raat se mil kar palTūñ kyā
jab sub.h se maiñ tā-shām chalī

use sub.h-e-azal inkār kī jur.at huī kyūñkar
mujhe mālūm kyā vo rāz-dāñ terā hai yā merā

ye nūr-e-sub.h hai āġhāz sirf ik din kā
vo din jo shaam guzarte kabhī rahā hī nahīñ

kab sub.h ke naale kaam aa.e kyā girya-e-nīm-shabī se milā
is qarya-e-ḳhvāb-faroshāñ meñ tum kis ke liye bedār hue

libās-e-sub.h meñ hai koī rahbar-e-sādiq
jagā rahī hai añdhere ko raushnī kī pukār

sub.h hotī hai to daftar meñ badal jaatā hai
ye makāñ raat ko phir ghar meñ badal jaatā hai

ek sub.h maiñ bedār huā to ḳhudā ġhā.eb thā
ye behad tashvīsh kī baat thī

raat phir raat hai ik roz guzar jā.egī
sub.h kī aas azā.em meñ basā.e rakkho

sub.h-e-nau ne kaaT Daale shām-e-zulmat ke hisār
kis tarah roke koī kirnoñ kī jū-e-shīr ko

vo jis kī yaad satātī hai rāt-din 'fāriġh'
na qabl-e-sub.h na vo ba.ad-e-shām aa.egā