Tags-Subah

āñkhoñ se duur sub.h ke taare chale ga.e
niiñd aa ga.ī to ġham ke nazāre chale ga.e

sub.h-e-daraḳhshāñ apne vatan meñ ḳhvāb-e-pareshāñ apne vatan meñ
kaif-e-musalsal raqs-e-bahārāñ jalva-e-ḳhandāñ apne vatan meñ

diid kā bār-e-amānat na uThegā us shab
ḳhūñ-chakāñ sub.h talak dīda-e-hairāñ hoñge

tamām aurāq shabnamistān-e-sahar kī kirnoñ se jagmagā.e
tulūa hotī hai sub.h jaise kalī tamannā kī muskurā.e

sahar hote hī dam niklā ġhash aate hī ajal aa.ī
kahāñ huuñ maiñ nasīm-e-sub.h pañkhā kis ko jhaltī hai

rāt-bhar bārish-e-ilhām rahī hai dil par
sub.h tak abr-guhar-bār ne sone na diyā

mujh ko chhū jaatī hai aa kar jo kabhī subah tirī
har taraf phūloñ ke dilchasp nazāre dekhūñ

os se bhīgī huī subah ko chhū luuñ jab maiñ
apnī palkoñ pe maiñ ashkoñ ke sitāre dekhūñ

sub.h-dam mujh ko na pahchān sakā ā.īna
maiñ shab-e-ġham kī masāfat se niDhāl aayā thā

ye sub.h hai sūraj kī siyāhī se añdherī
aa.egī abhī ek sahar mahr-chakāñ aur

uTh sub.h huī murġh-e-chaman naġhma-e-sarā dekh
nūr-e-sahar-o-husn-e-gul-o-lutf-e-havā dekh

shaam huī to kaale saa.e umaD paḌe
sub.h ko to har chiiz suhānī lagtī hai

din nikalte hī vo ḳhvāboñ ke jazīre kyā hue
sub.h kā sūraj mirī āñkheñ churā kar le gayā

marg-e-shām-e-visāl-e-hirmāñ hai
sub.h-dam jāñ-nisār honā thā

sūraj apnī pichkārī se kartā hai yalġhār
sub.h ke ujle dāman pe hai rañgā-rañg bahār

sub.h kā taarā pūchh rahā hai
kab tak daur-e-jām rahegā

aane vaalī sub.h ginegī raat ke andhe tūfāñ meñ
kitne sāhil hī par Duube kitne bhañvar ke paar hue

ye payām de ga.ī hai mujhe bād-e-sub.h-gāhī
ki ḳhudī ke ārifoñ kā hai maqām pādshāhī

shaam kī āḳhirī aahaT pe dahaltā huā dil
sub.h kī pahlī havāoñ meñ bhigoyā huā maiñ

sub.h hote bujh ga.e saare charāġh
dāġh-e-dil tā shaam jaltā hī rahā