Tags-Subah

ek din sub.h jo dekhā to sarā.e meñ na thā
jaane kis des gayā hai vo divānā DhūñDo!!

yuuñ kahāñ mumkin thā husn-e-ḳhās kā dīdār-e-ām
ban ga.ī āḳhir sarāpā sub.h-e-mahshar ā.īna

raat ke jaage sub.h kī halkī narm havā meñ so.e haiñ
dekheñ kab tak niiñd ke maate uThne meñ tāḳhīr kareñ

sahar-o-shām meñ tanzīm kahāñ hotī hai
ḳhvāhish-e-sub.h kī tajsīm kahāñ hotī hai

unheñ be-yaqīnī-e-sub.h kī maiñ dalīl duuñ bhī to kis tarah
vo jo ibtidā meñ hī intihā kī zamānatoñ meñ lage rahe

the sub.h ko vo sāġhar-e-jam dast-e-gadā meñ
ālūda mai-e-shab ko jo kashkol rahe the

dil ko tire ḳhayāl se bahlā rahā huuñ maiñ
yuuñ shām-e-ġham ko sub.h kiye jā rahā huuñ maiñ

nazar meñ naqsh hai sub.h-e-safar kī vīrānī
bas ek maiñ thā aur ik sub.h kā sitārā thā

haq-shanāsī kā chalan ham meñ nahīñ baaqī rahā
sub.h apnī pur-alam hai pur-ḳhatar har shaam hai

tesha-e-nūr liye sub.h kā paiġhām liye
koī bedār mile koī to hoshyār mile

maiñ ik nizām-e-kohan ke narġhe meñ saañs le kar bhī sochtā huuñ
ki sub.h kaise tulūa hogī ki shaam kis rañg meñ Dhalegī

jo rañg mujh meñ sañvar rahe the vo shaam hote hī kho ga.e haiñ
jo sham.a mere vajūd meñ jal rahī hai kis sub.h tak jalegī

fazā tabassum-e-sub.h-e-bahār thī lekin
pahuñch ke manzil-e-jānāñ pe aañkh bhar aa.ī

mujh pe hañstā hai kyuuñ sitāra-e-sub.h
raat bhar jāgtā to maiñ bhī huuñ

sub.h kī shabnamī palkoñ ko masalte hue haath
ik na.e ḳhvāb kī koñpal se bañdhe rahte haiñ

ai raat ke maaro tumheñ kis tarah bujhā.ūñ
ik sub.h bhī ik din bhī hai is raat se aage

sub.h darveshoñ ne phir raah lī apnī apnī
maiñ bhī baiThā thā vahāñ qissa sunāne ke liye

hai havāsoñ pe shab-e-hijr kā is darja asar
sub.h ke rañg bhī kaale nazar aate haiñ mujhe

shab ke bhaTke hue raahī ko ḳhabar de koī
sub.h-e-rañgīñ kī bahāroñ kā nishāñ kyā hogā