Tags-Subah

baḌā maza hameñ is bandagī meñ hāsil ho
jo sub.h o shaam tirā naam le liyā jaa.e

sarod-e-bāñg-e-mo.azzin nahīñ dalīl-e-sahar
mizha pe sub.h kā taarā nahīñ to kuchh bhī nahīñ

sub.h jab aañkh khulī logoñ kī logoñ pe khulā
jo bhī thā ḳhvāb ke andar se nikaltā huā thā

mil rahā hai sub.h ke taare se jaatā māhtāb
raat ke tārīk ziine se utar jaane ke ba.ad

ḳhuuñ rulātī rahī ik umr-e-shab-e-tār mujhe
tab kahīñ jā ke mile sub.h ke āsār mujhe

naqīb-e-ahd-e-zarrīñ sirf itnā mujh ko batlā de
tulū-e-sub.h-e-nau bar-haq magar tāroñ ne kyā paayā

zarā sī baat pe ghuT ghuT ke sub.h kar denā
mirī tarah bhī koī merā ġham-gusār na ho

sub.h ke qāfiloñ se nibh na sakī
maiñ akelā savād-e-shab meñ chalā

shām-e-ḳhizāñ ko sub.h-e-bahārāñ banā diyā
tartīb-e-zīst ban ga.iiñ ta.azīreñ ishq kī

shāḳh hilī to Dar gayā dhuup khilī to mar gayā
kaash kabhī to jiite jī sub.h kā sāmnā karūñ

dam-e-sub.h-e-nau-bahārāñ jo kalī chaman meñ chaTkī
to gumāñ huā ki jaise mujhe aap ne pukārā

allāh allāh kar are zāhid
jām-e-mai sub.h-o-shām are tauba

dil bhī thakan se chuur huā aur dimāġh bhī
aur āsmāñ pe sub.h ke āsār tak nahīñ

sub.h ko shaam kī nahīñ parvā
din bhī ab raat par nahīñ rote

ye raat tā.ir-e-hijrat-zada ġhanīmat hai
tulū-e-sub.h savād-e-kamīñ meñ hotī hai

kaTte hī kaTegī hijr kī shab liye dard chalo tā-sub.h-e-tarab
in shauq kī maarī āñkhoñ se kuchh va.ada-o-paimāñ aur sahī

hamārī rākheñ jo le jā sabā so ho kar sub.h
jaleñ haiñ shola-ḳhurshīd par ye dekh ta.ab

sub.h-e-ishrat hai vo na shām-e-visāl
haa.e kyā ho gayā zamāne ko