Tags-Subah

bheroñ meñ din nikaltā dikhā.ūñ maiñ dahr ko
aur sub.h tak charāġhoñ kī lo kar luuñ aur gā.ūñ

har sub.h jab ki sub.h-e-qayāmat kī tarah aa.e
aise meñ kaun hogā jo soche sabāt kī

shab-bhar jis rūdād-o-alam par ashk bahāte guzrī thī
sub.h huī to ham ne jaanā apnā hī afsāna thā

sub.h ke ba.ad bhī jo raushan hoñ
in diyoñ ko bujhāyā jaatā hai

laḌte rahnā hai tasalsul se mujhe sub.h talak
aur talvār bhī tabdīl nahīñ karnī mujhe

sub.h bichhaḌ kar shaam kā va.ada shaam kā honā sahal nahīñ
un kī tamannā phir kar lenā sub.h ko pahle shaam karo

vo sub.h ke taare kī jhapakne sī lagī aañkh
kuchh der zarā dīda-e-anjum-nigarāñ aur

furqat kī raat roz-e-qayāmat kahīñ na ho
hotī nahīñ jo sub.h-e-shab-e-tār kyā sabab

niiñd se uTh kar kisī ne is tarah āñkheñ malīñ
sub.h ke taare ko dekhā aañkh jhapkāte hue

ġhurbat se mirī sub.h o masā khelne vaale
terā bhī divālā jo khisak jaa.e to kyā ho

ḳhvāb likhtī rahīñ āñkheñ dar-o-bām-e-shab par
sub.h ik pahlū dikhātī rahī sachchā.ī kā

siine pe ye pallū hai ki ik mauj-e-hayābī
māthā hai ki ik sub.h kā partav hai shahābī

jhoñke nasīm-e-sub.h ke aa aa ke hijr meñ
ik din charāġh-e-hastī-e-āshiq bujhā.eñge

vahīñ jhaḌ-guloñ ke tuude bañdheñ gulbanoñ ke nīche
kabhū sub.h-dam chaman meñ jo vo ġhuncha-lab ho ḳhandāñ

siyāhī raat kī pīchhe samundar din kā aage
sitāra sub.h kā merī tarah maddham bahut thā

jhūTī bātoñ kī tajallī nazar aa.e aise
sub.h-e-kāzib kī safedī phire dālānoñ meñ

DhūñDne se gar nahīñ miltā ḳhudā phir DhūñDhiye
sub.h us kī justujū meñ shaam honā chāhiye

nasīm-e-sub.h bhī letī hai yaañ pe izn-e-ḳhirām
hai ye maqām maqām-e-qarār-e-nik.hat-e-gul

vo ufuq par jo ujāle se nazar aate haiñ
āmad-e-sub.h-e-daraḳhshāñ kī ḳhabar dete haiñ

kisī shaam mere jilau meñ thā koī ḳhvāb vus.at-e-shahr kā
kisī sub.h mere vajūd par ye zamīn logoñ ne tañg kī