Tags-Subah

kisī shaam mere jilau meñ thā koī ḳhvāb vus.at-e-shahr kā
kisī sub.h mere vajūd par ye zamīn logoñ ne tañg kī

ġham se kahāñ ai ishq mafar hai
raat kaTī to sub.h kā Dar hai

kyā kahūñ uubne lagā huuñ 'jamāl'
ek hī jaise sub.h o shaam se maiñ

hamārī sub.h hujūm-e-balā kī nazr huī
hamārī shaam bhī dasht-e-gumāñ maiñ baiTh ga.ī

vo bahr-e-karam jo mehrbāñ ho jaa.e
har dāman-e-tar sub.h-e-jināñ ho jaa.e

Thahro Thahro abhī se sub.h kahāñ
ye to pichhle kā kuchh samāñ sā hai

sub.h ke tiin baj ga.e 'amabar'
uTh jā 'rāhul' bhī uTh gayā hogā

vahī āsmān hai vahī zamīñ magar aañkh us kī jo phir ga.ī
na vo din hai ab na vo raat hai na vo sub.h hai na vo shaam hai

sub.h-saverā daftar biivī bachche mahfil nīndeñ raat
yaar kisī ko mushkil bhī hotī hai is āsānī par

kisī kī yaad ke lamhe hamāre dil kī taraf
ibādatoñ ke liye sub.h-o-shām aate haiñ

ai sham-e-sub.h-e-mahfil un ko jalā ke bujhnā
do-chār aur tere parvāne rah ga.e haiñ

qatl honā hai sar-e-shām-e-tamannā har roz
roz laanā hai na.ī sub.h kī tanvīr kā rañg

ab vo kyā ā.eñge tum bhī aañkh jhapkā lo 'niyāz'
sub.h kā taara bhī ab to jhilmilātā jaa.e hai

harīm-e-shab meñ ḳhuuñ rotā huā māh-e-tamām
nigār-e-sub.h qissa muḳhtasar kartā huā

shab-e-ġham kāTne vāloñ se pūchho
hai kitnī shoḳh subh-e-nau-damīda

numūd-e-sub.h ko detā sadā chalā aa.e
hamārī raat meñ baaqī hai aisā ḳhvāb kahāñ

tulū-e-sub.h kā manzar mire andar hai ḳhvābīda
mire andar zamānoñ kī hasīñ takrār ho jaise

thā āftāb sub.h kuchh to shaam ko kuchh aur
uruuj aur zavāl haiñ ajiib ajiib se

sub.h kā darvāza khulte hī chalo gulshan kī samt
rañg uḌ jā.egā phūloñ kā agar tāḳhīr kī

fasurda ḳhalvatoñ meñ yaad aa kar
rulāte haiñ vo sub.h-o-shām ham ko