Tags-Subah

kisī bhī sub.h kā marham asar nahīñ kartā
ki har sahar hai yahāñ dūsrā kināra-e-shab

ai sub.h-e-der-ḳhez unheñ āvāz de jo hai
ik shām-e-zūd-ḳhvāb ke sukh meñ magan paḌe

sub.h tak be-talab maiñ jāgūñgā
aaj to be-sabab maiñ jāgūñgā

kaTne lagīñ rāteñ āñkhoñ meñ dekhā nahīñ palkoñ par aksar
yā shām-e-ġharībāñ kā jugnū yā sub.h kā taarā hotā hai

maiñ bistar-e-ḳhayāl pe leTā huuñ us ke paas
sub.h-e-azal se koī taqāzā kiye baġhair

shab-e-hijrāñ meñ mat pūchho ki kin bātoñ meñ rahtā huuñ
tasavvur bāñdh us kā sub.h tak kuchh kuchh maiñ kahtā huuñ

hijr meñ shab bhar dard-o-talab ke chāñd sitāre saath rahe
sub.h kī vīrānī meñ yaaro kaise basar auqāt kareñ

naqsh tīkhe bāñkī chitvan daañt motī kī qatār
sub.h kī laalī kā manzar us kī rañgat kā nikhār

har ek sub.h vazū kartī haiñ mirī āñkheñ
ki shāyad aaj to aa jaa.e vo habīb nazar

dil dhaḌakne lagā phir sub.h-e-judā.ī aa.ī
phir vahī dard vahī pahlu-e-ḳhālī hogā

shaam se sub.h talak dil thā tirī sarhad meñ
aise hālāt meñ to tiir ko chal jaanā thā

vaqt ke hoñToñ pe raqsāñ haiñ mastī kā ik raag liye
sub.h-e-qayāmat ke hañgāme husn-e-maujūdāt ke naam

rah-rav-e-tamannā kī dāstāñ hai bas itnī
sub.h o shaam ik dhun meñ ḳhud ko nīm-jāñ rakhnā

muñh añdhere jagā ke chhoḌ ga.ī
ek sub.h-e-jamāl kī āvāz

vo sub.h o shaam miTTī ke qasīde bhī sunātā
aur us ne haath bhī ġhaddār par rakkhā huā thā

ā.eñge nazar sub.h ke āsār meñ ham log
baiThe haiñ abhī parda-e-asrār meñ ham log

jam.a kartī hai mujhe raat bahut mushkil se
sub.h ko ghar se nikalte hī bikharne ke liye

kaT ga.ī raat mirī sa.ī-e-musalsal ke tufail
raushnī sub.h-e-daraḳhshāñ kī ḳhabar laa.ī hai

vahī navā Dūbtī shaboñ meñ
azān-e-sub.h-e-niyāz ban kar

shab se parvāne kī lagan meñ sham.a
sub.h tak roī zaar zaar afsos