Tags-Subah

havā-e-sub.h yak-ālam garebāñ chākī-e-gul hai
dahān-e-zaḳhm paidā kar agar khātā hai ġham merā

safīr-e-sub.h-e-daraḳhshāñ chalā jo mashriq se
dayār-e-shab kā shahanshāh bad-havās huā

sub.h-dam bhī yuuñ fasurda ho gayā
ai dil-e-nāzuk tujhe kyā ho gayā

phir raat kī tārīk adā.eñ haiñ musallat
phir sub.h ke hāthoñ se hinā chhūT rahī hai

is se pahle bhī to aisī hī ghaḌī aa.ī thī
sub.h-e-vahshat kī tarah shām-e-ġharībāñ kī tarah

ham apne ġham kā fasāna kahā kiye shab-bhar
huī jo sub.h to zikr-e-ġham-e-jahāñ niklā

sub.h tak thā vahīñ ye muḳhlis bhī
aap rakhte the shab jahāñ tashrīf

sub.h hogī kahānī banegī koī
zindagī kā yahī mas.ala rah gayā

us ke chehre se sub.h uThā.ī hai
us kī āñkhoñ se shab churā rahe haiñ

koī to sub.h-e-rifāqat se kar sakūñ ta.abīr
koī to shaam tire saath apne naam likhūñ

nasīm-e-sub.h ibārat hai terī ḳhushbū se
sabā kī narm-ravī ko tirā ḳhirām likhūñ

muskurāhaT nahīñ aatī lab-e-sāqī pe 'shamīm'
ġham-e-daurāñ ke liye sub.h-e-najāt aatī hai

havas-e-ḳhalvat-e-ḳhurshīd-o-nishāñ aur sahī
duur hai sub.h to ye ḳhvāb-e-girāñ aur sahī

sub.h-savere
ek laraztī kāñptī sī āvāz aatī hai

sub.h ḳhud batā.egī tīrgī kahāñ jaa.e
ye charāġh kī jhūTī raushnī kahāñ jaa.e

jalva-e-sub.h-e-qayāmat kā maza detā hai
chāk-e-dil chāk-e-jigar chāk-e-garebāñ mujh ko

nahīñ apnī ḳhabar 'farhān' ko lekin ba-sad hairat
vo apne saath har dam sub.h kā aḳhbār rakhtā hai

kisī mai-kada meñ rahā 'jigar' ki thā mahv-e-ḳhvāb meñ raat bhar
huiiñ kyā bashārateñ sub.h-dam ki uThā to zamzama-ḳhvāñ uThā

sitāra sub.h kā raushan thā shaam se 'ābid'
yahī thī maut harīfān-e-bazm-e-shab ke liye

sub.h uTh kar āñsuoñ se ḳhuun ke rotā huuñ maiñ
dil ke naqshe meñ vafā kā rañg bharne ke liye