Tags-Subah

har sub.h-o-shām baaġh meñ sahrā meñ juuñ nasīm
us gul kī justujū kī havas par ḳharāb huuñ

har ek bastī badaltī hai rañg-rūp ka.ī
jahāñ bhī sub.h guzāro udhar hī shaam karo

vo sub.h jalva jalvagar-e-bāġh thā jo raat
murġh-e-sahar ne dhuum machā.ī tamām shab

badan kī aañch se sañvlā ga.e haiñ pairāhan
maiñ phir bhī sub.h ke chehre pe shaam likhtā huuñ

dekhiye sub.h-e-junūñ zehn meñ kab taal.e ho
aql suntā huuñ ki hai ik abadī raat ai 'josh'

raat pal bhar ko palkeñ jhapakne na diiñ
subah hote hī āñkheñ churāne lage

maiñ aaj daftar meñ sub.h pahuñchā
to ik nayā zard zard chehra nazar paḌā

sub.h kī rañgat zardī-mā.il
shaam nahīñ hai dhaḌkā sā hai

yakāyak phir charāġh ummīd ke hone lage raushan
ye sub.h-e-roz-e-mahshar hai ki shām-e-sub.h-e-hastī hai

niiñd bhare halkore leñ rāteñ kis ke hāthoñ
kaun charāġh-e-sub.h ujāle ye ham kyā jāneñ

sub.h kā saaz bhī to chheḌ zarā
shaam kā zikr baar baar na kar

us ne sub.h-e-shab-e-visāl mujhe
jaate jaate bhī aa ke dekh liyā

muñh-añdhere hī 'nāsir' kise DhūñDne chal diye
duur hai sub.h-e-raushan abhī so raho so raho

maiñ bistar-e-ḳhayāl pe leTā huuñ us ke paas
sub.h-e-azal se koī taqāzā kiye baġhair

vo aa rahe haiñ vo ā.eñge aa rahe hoñge
shab-e-firāq ye kah kah ke sub.h kī maiñ ne

sub.h-dam kyā DhūñDte ho shab-ravoñ ke naqsh-e-pā
jab se ab tak bār-hā mauj-e-sabā aa.ī ga.ī

tū ne tāroñ se shab kī maañg bharī
mujh ko ik ashk-e-sub.h-gāhī de

kab sub.h ke naale kaam aa.e kyā girya-e-nīm-shabī se milā
is qarya-e-ḳhvāb-e-faroshāñ meñ tum kis ke liye bedār hue

'mīr' se bai.at kī hai to 'inshā' miir kī bai.at bhī hai zarūr
shaam ko ro ro sub.h karo ab sub.h ko ro ro shaam karo

nazākat us gul-e-rānā kī dekhiyo 'inshā'
nasīm-e-sub.h jo chhū jaa.e rañg ho mailā