Tags-Subah

sard se marmar pe shab ko jo ubhāre the nuqūsh
sub.h ko dekhā to sab aks-e-hunar nāyāb the

khurdure aur khokhle bargad kā baazū thaam kar
sub.h-e-sīmīñ kā ma.āl-e-tai-shuda ho jā.ūñgā

mujhe yaqīñ hai ye sub.h-e-nau bhī mire sitāre kā saath degī
ki maiñ ne ik ism kī madad se ġhubār ko āsmāñ kiyā hai

sub.h-e-chaman meñ ek yahī āftāb thā
is aadmī kī laash ko e.azāz se uThā

jise kal raat bhar puujā gayā thā
vo but kyuuñ sub.h ko TuuTā huā thā

chashm dar par thī sub.h tak shāyad
kuchh kisī se qarār thā kyā thā

hai āb-e-nahr sūrat-e-ā.īna jalva-gar
tābāñ hai misl-e-chashma-e-ḳhurshīd har bhañvar

raat ham ne jugnuoñ kī sab dukāneñ bech diiñ
sub.h ko nīlām karne ke liye kuchh ghar bhī the

rātoñ se chhīn kar vo charāġhoñ kī raushnī
jab sub.h ho ga.ī to use raat kar ga.ī

niiñd hai thakan sī hai silvaTeñ haiñ yādeñ haiñ
kitne log uTheñge sub.h mere bistar se

jurm ke ba.ad khulā dil pe dar-e-ḳhauf-e-sazā
zehan bedār huā subah ke āġhāz ke saath

ḳhaak bhī uḌ rahī hai rastoñ meñ
āmad-e-sub.h kā samāñ bhī hai

ye hai shaam mausam-e-dard kī ye hai sub.h chehra-e-zard kī
hai bahār par ġham-e-zindagī koī dil-ḳhizāñ ho to le ke aa

nasīm-e-sub.h-e-chaman se idhar nahīñ aatī
hazār haif ki gul kī ḳhabar nahīñ aatī

āftāb-e-dil-e-raushan diyā saudā ne mujhe
sub.h-e-hādī huā ye chaak garebāñ mujh ko

gar dam-e-sub.h shahīdān-e-chaman sair karo
teġh-e-qātil hai dam-e-minnat-e-ehsāñ mujh ko

dekh kar gaal tire zulf ke halqe se huī
matl.a-e-sub.h-e-vatan shām-e-ġharībāñ mujh ko

go sub.h duur hai shab-e-hijrāñ kī lek tū
apnī taraf se tū na kar ai nāla-go tahī

sub.h-e-pīrī hai ġhāfilān-e-jahāñ
ḳhvāb-e-ḳhargosh meñ haiñ jitne haiñ