Tags-Subah

ishq karo to ye bhī socho arz-e-savāl se pahle
hijr kī puurī raat aatī hai sub.h-e-visāl se pahle

bhuul jā.egā koī mujh ko bujhāne kā hunar
sub.h bhī aa.ī to shab bhar se jalī rah jā.ūñgī

yaad rah rah kar kisī kī hai satātī raat bhar
sub.h hote bhuul jaanā ye tujhe sheva na thā

'hālī' nashāt-e-naġhma-o-mai DhūñDhte ho ab
aa.e ho vaqt-e-sub.h rahe raat bhar kahāñ

sub.h se dil masrūr hai 'sāhir'
raat ye ham par bhārī aa.ī

aTak rahā thā añdherā sāñsoñ meñ ḳhauf ḳhuuñ meñ gilā huā thā
ai sub.h-e-kāzib jo chhoḌ kar zinda shab Talī hai bahut bhalī hai

ḳhauf dil se na gayā sub.h ke hone kā 'qamar'
vasl kī raat guzārī hai shab-e-ġham kī tarah

shab-gazīdoñ se hisāb-e-ġham chukāne ke liye
tum na aa.e the magar sub.h-e-qayāmat aa.ī thī

kahīñ to ḳhatm huā hogā raat kā afsūñ
vahīñ pe uqda-e-sub.h-e-visāl rakhnā hai

kūche se tire gaahe ghar shab ko jo aatā huuñ
phir sub.h hue sote uTh jaag chale jaanā

DhūñDhte phirte haiñ dil ko sub.h se har-sū 'rashīd'
dil-rubā thā ek pahlū meñ hamāre raat ko

dil jigar lene phir aa.e sub.h ko kahte hue
rah ga.e bistar pe do motī hamāre raat ko

aa ga.ī sub.h-e-qayāmat aur maiñ soyā nahīñ
phir na aa.ī niiñd tum jab se sidhāre raat ko

saf-e-zāhidāñ hai to be-yaqīñ saf-e-mai-kashāñ hai to be-talab
na vo sub.h vird-o-vazū kī hai na vo shaam jām-o-subū kī hai

kār-e-azīm kab koī qudrat meñ thā 'suhail'
ham bas ufuq pe sub.h ke āsār se rahe

har sub.h apne ghar meñ usī vaqt jāgnā
āzād log bhī to giraftār se rahe

din ko raat kaheñ so bar-haq sub.h ko shaam kaheñ so ḳhuub
aap kī baat kā kahnā hī kyā aap hue farzāne log

siyāhī dhuup meñ hai baat kyā hai
agar ye sub.h hai to raat kyā hai

ai qamar sub.h huī ab to uTho mahfil se
sham.a gul ho ga.ī ruḳhsat hue parvāne tak

sub.h hotī nahīñ ai ishq ye kaisī shab hai
qais o farhād ke dohrā liye afsāne tak