Tags-Subah

sub.h savere ran paḌnā hai aur ghamsān kā ran
rātoñ raat chalā jaa.e jis ko jaanā hai

ham se mat pūchh sub.h kab hogī
ham ne sadiyāñ gañvā.ī haiñ so ke

hastī ke bhayānak nazzāre saath apne chale haiñ duniyā se
ye ḳhvāb-e-pareshāñ aur ham ko tā-sub.h-e-qayāmat sonā hai

ham hī ġham-ḳhvār-e-tamannā the na so.e sub.h tak
jab dar-o-dīvār ko niiñd aa ga.ī ghar so gayā

mausam-e-saffāk ne vo sub.h raushan kī hai 'nāz'
qatra-e-shabnam sar-e-shāḳh-e-gul-e-tar so gayā

sub.h-e-tarab to mast-o-ġhazal-ḳhvāñ guzar ga.ī
shām-e-alam jo aa.ī to aa kar Thahar ga.ī

taḌpā qafas meñ kaun jo ai sub.h-e-nau-bahār
rū-e-gul-o-giyāh sabā chashm-tar ga.ī

talavvun aisā in abnā-e-rozgār meñ hai
ki sub.h miliye to hai charparī salām-alaik

raat bhar māñgī duā un ke na jaane kī 'qamar'
sub.h kā taara magar le kar payām aa hī gayā

chaar jānib haiñ siyah raat ke saa.e lekin
ufuq-e-dil pe na.ī sub.h kī tanvīreñ haiñ

nasīm-e-sub.h mujhe bhī gale lagātī jā
maiñ vo diyā huuñ jalā hai jo rāt-bhar tanhā

us kī pā-posh kī chamkī jo dam-e-sub.h kiran
chūmne us ke qadam matla-e-anvār jhukā

raat bhar girya-e-shabnam se jo ġhunche the udaas
sub.h hote hī hañsāne ko sabā aa.ī hai

ḳhurshīd-rū hamārā jis se milegā har sub.h
dānista vo namāzeñ apnī qazā karegā

raat vo aañsū bahā.e haiñ ki mere qalb par
sub.h kā āġhosh vā karnā mirī ujrat nahīñ

rukā huā huuñ maiñ ik gardishī jazīre par
guzar rahe haiñ mire sub.h-o-shām gardish meñ

ḳhudā kā shukr adā kartā huuñ maiñ sub.h-o-masā
laboñ pe rakh ke darūd-o-salām gardish meñ

huā na mujh se koī ham-kalām gardish meñ
dhuāñ hue haiñ mire sub.h-o-shām gardish meñ

shaam bhī hai sub.h bhī hai aur din bhī raat bhī
māh-e-tābāñ ab bhī hai mahr-e-daraḳhshāñ ab bhī hai

kaaTī hai kaise sub.h kahāñ shaam bhuul jaa.eñ
Thahreñ kahīñ ye gardish-e-be-nām bhuul jaa.eñ