Tags-Taghaful

gar karo qatl mire dil kuuñ taġhāful siiñ jaan
phir ke da.avā na karūñ hashr ke maidān meñ aa

shān-e-taġhāful apne nau-ḳhat kī kyā likheñ ham
qāsid muā tab us ke muñh se javāb niklā

ze-hāl-e-miskīñ makun taġhāful durā.e naināñ banā.e batiyāñ
ki tāb-e-hijrāñ nadāram ai jaañ na lehū kaahe lagā.e chhatiyāñ

hai vahāñ shān-e-taġhāful ko jafā se bhī gurez
iltifāt-e-nigah-e-yār kahāñ se lā.ūñ

zauq-e-tamannā se tire sarshār dil
tīr-e-taġhāful se magar majrūh bhī

tirī nigāh-e-taġhāful se dil ne paayā hai
vo ek kaif jise intizār kahte haiñ

nafas nafas jo payām-e-hayāt detī hai
usī nazar ko taġhāful-shi.ār kahte haiñ

phir aur taġhāful kā sabab kyā hai ḳhudāyā
maiñ yaad na aa.uuñ unheñ mumkin hī nahīñ hai

sayyād ko to ḳhvāb-e-taġhāful se kaam hai
ahvāl-e-tā.irān-e-giraftār ho so ho

dil hai merā mā.il-e-fariyād aaj
dekh kar un ke taġhāful kā samāñ

adāvateñ thīñ, taġhāful thaa, ranjisheñ thiiñ bahut
bichhaḌne vaale meñ sab kuchh thaa, bevafā.ī na thī

jab taġhāful kā irāda kar liyā
kaun kartā fikr ḳhair o diid kī

kar diyā tere taġhāful ne adhūrā mujh ko
ek hichkī agar aa jaa.e to puurā ho jā.ūñ

rah ga.e zauq-e-tabassum meñ taġhāful ke shahīd
bismiloñ kā ḳhūñ-bahā jallād par baaqī rahā

ye be-ruḳhī ye taġhāful kahāñ talak pyāre
tumhāre kaam hī ā.ūñgā mat gañvāo mujhe

harf-e-ḳhufta kī tarah chashm-e-taġhāful ke bhī
ba.az auqāt to mafhūm ajab jāgte haiñ

umiid chashm-e-taġhāful-shi.ār se kab thī
is iltifāt-e-farāvāñ meñ koī raaz na ho

tirī surmagīñ āñkhoñ ke sadqe inheñ chheḌ na panja-e-mizhgāñ se
abhī zaḳhm-e-jigar haiñ tamām hare ai mahv-e-taġhāful be-ḳhabare

ye sab bāteñ munāsib haiñ magar phir bhī mere hamdam
taġhāful kī tire halkī adā se choT lagtī hai