Tags-Tamanna

hai aa.ī mushkil se vasl kī shab ki jis kī muddat se thī tamannā
jo maiñ ne shikve kiye the us kī karo na tum baar baar bāteñ

huiiñ haiñ jis din se chaar āñkheñ tumhārī ai yaar 'mashriqī' se
yahī tamannā hai baiTh kar tum suno hamārī do-chār bāteñ

un kī tamannā merī koshish bāham va.ade aur qasmeñ
kuchh merī taqdīr ke sadqe baaqī sab hālāt ke naam

jī chāhtā hai umr-e-mohabbat na ḳhatm ho
mar jā.iye kisī kī tamannā liye hue

aa apne dil meñ merī tamannā liye hue
shauq-e-kalām o zauq-e-tamāshā liye hue

sar-e-tāq-e-tamannā bujh ga.ī hai sham-e-umīd
udāsī baḌh ga.ī hai be-dilī kam ho ga.ī hai

ek le de ke tamannā hai so vo bhī nākām
dil meñ kyā hai jo tirī jalva-gah-e-nāz meñ hai

jiine se bhar chukā hai dil-e-zār kyā karūñ
marne kī ārzū-o-tamannā nahīñ abhī

ḳhaak se tā-ba-falak ḳhvāb kā phailā dāman
koī koshish na kahīñ aur tamannā har jā

soz-e-dil dard-e-jigar ḳhūn-e-tamannā ashk-e-ġham
ek laġhzish kitne afsānoñ kā unvāñ ho ga.ī

ārzū-dar-ārzū baḌhtī ga.iiñ mahrūmiyāñ
har tamannā rafta rafta dushman-e-jāñ ho ga.ī

vo mujh se farmā rahe haiñ hañs kar hamesha milne kī aarzū par
malāl hogā muhāl shai kī kabhī tamannā na kījiyegā

dil-e-hazīñ kī tamannā nigāh ke matlūb
ḳhudā rakhe vo sabhī kuchh haiñ chāragar ke sivā

ik ik qadam fareb-e-tamannā se bach ke chal
duniyā kī aarzū hai to duniyā se bach ke chal

nahīñ dil meñ dāġh-e-tamannā bhī baaqī
unhīñ par se un kī nishānī luTā dī

aaj us moḌ pe hai shahr-e-tamannā ābād
tirā dāman nigah-e-shauq ne chūmā thā jahāñ

mauj-dar-mauj ubharte haiñ tamannā ke sarāb
merī tishna-dahnī meñ haiñ samundar pinhāñ

tere hī jalve se hai bāġh-e-tamannā kī bahār
yahī tanvīr hai ā.īna-dil kā paanī

baaqī hai ab bhī tark-e-tamannā kī aarzū
kyūñkar kahūñ ki koī tamannā nahīñ mujhe

milegā jab talak mujh ko na vo jān-e-tamannā
maiñ sab kāmoñ ko apne multavī kartā rahūñgā