Tags-Tamanna

muddatoñ kashmakash-e-yās-o-tamannā meñ rahe
ġham ne jiine na diyā shauq ne marne na diyā

ik rañg sā hai rañg-e-tamannā se mumāsil
ik abr sā hai dīda-e-nam-nāk se aage

ruke nahīñ haiñ kahīñ qāfile tamannā ke
farāz-e-dār ye lambe safar se aa.e haiñ

qatra dariyā hai to kyuuñ shorish-e-dariyā-talabī
har tamannā ko mohabbat kā ziyāñ kahtā huuñ

dariyā ko samajhne kī tamannā hai to phir kyuuñ
dariyā ke kināre se kinārā nahīñ karte

qatl honā hai sar-e-shām-e-tamannā har roz
roz laanā hai na.ī sub.h kī tanvīr kā rañg

raqīboñ ko tamannā hai to bāshad
tumheñ matlab parā.ī aarzū se

ye rāh-e-tamannā hai yahāñ dekh ke chalnā
is raah meñ sar milte haiñ patthar nahīñ miltā

is tamannā meñ ki ahl-e-dil mujhe tujh sā kaheñ
terā ik ik rañg ik ik Dhañg apnātā rahā

dil ne jab bhī koī saada sī tamannā kī hai
zindagī ek nayā zaḳhm lagā laa.ī hai

jab kashtī sābit-o-sālim thī sāhil kī tamannā kis ko thī
ab aisī shikasta kashtī par sāhil kī tamannā kaun kare

ek ḳhvāhish hai jo muddat se galā ghoñTe hai
ik tamannā hai jo marne nahīñ detī mujh ko

aane se tire rañg badal degī tamannā
alfāz badal jā.eñge ai dost duā ke

ik baar sunī thī so mire dil meñ hai maujūd
ai jān-e-tamannā tirī taqrīr abhī tak

ye ham ne bhuul kī aa pahuñche un kī mahfil meñ
par un se arz-e-tamannā to bhuul kar bhī nahīñ

ishq kī umr jab uchhāl kī thī
kyuuñ tamannā tujhe zavāl kī thī

naqāb ulaT de jo baḌh kar ruḳh-e-tamannā se
ye aarzū hai ki mujh ko vo tishnagī denā

haañ ye to batā ai dil-e-mahrūm-e-tamannā
ab bhī koī hotā hai ki armāñ nahīñ hotā

ye sāya-nashīnān-e-guzar-gāh-e-tamannā
kuchh ishq ke kuchh aql ke bahkā.e hue haiñ