Tags-Tamanna

ek ḳhushbū mujhe bulātī hai
ik tamannā ne sar uThāyā thā

kis lagan kis tamannā se kis chaav se mausam-e-rañg-o-nik.hat ko dī thī sadā
kyā ḳhabar thī ki abr-e-bahār-āfrīñ aag ke phuul gulshan pe barsā.egā

ghar pahuñchne kī na jaldī na tamannā hai koī
jis ne milnā ho mujhe aa.e sar-e-rāh mile

sar-e-koh-e-tamannā kaun pahuñche
purāne zaḳhm ab tak dho rahe haiñ

is jafā par tumheñ tamannā hai
ki mirī iltijā kare koī

tire hī ġham ne kisī samt dekhne na diyā
ki ab hujūm-e-tamannā bhī tañg-dast lage

shab ke ā.īne meñ tasvīr-e-tamannā dekho
aks dikhlā.egā kyā tum ko sahar kā darpan

aaj āġhosh-e-tamannā thī shanāsā-e-visāl
razm-gāh-e-zindagī meñ tāza-dam aatā huuñ maiñ

ham ko bhī dekhnā hai ki ye munkarīn-e-ishq
kab tak raheñge terī tamannā kiye baġhair

ye sūd-o-ziyāñ kī bāteñ haiñ in bātoñ meñ kyā rakkhā hai
ik ḳhvāb-e-tamannā de ke mujhe ik ḳhvāb-e-tamannā chhīn liyā

ga.ī shab chāñd jaisā jab chamaktā hai ḳhayāl us kā
tamannā merī ik chhoTā sā bachcha ho hī jaatī hai

tai ho na sakā marhala-e-dasht-e-tamannā
dīvār banī paañv kī zanjīr pighal ke

phūñkā hai kis ne gosh-e-mohabbat meñ ai ḳhudā
afsūn-e-intizār tamannā kaheñ jise

mehr-o-vafā ḳhulūs-e-tamannā milan kī aas
kuchh kam nahīñ ki ham ne ye motī bachā liye

mire junūn-e-tamannā kā kuchh ḳhayāl nahīñ
lajā.e jaate haiñ dāman chhuḌā.e jaate haiñ

mustaqil harārat hai
hasrat-o-tamannā ke

kaheñ kyā hāl-e-dil apnā butoñ se
jo hai dil meñ tamannā jānte haiñ

ḳhabar huī kisī mad.hosh-e-aish ko na zarā
hamārī bazm-e-tamannā tamām raat luTī

ishq ko arz-e-tamannā meñ bhī lākhoñ pas-o-pesh
husn ke vāste inkār bhī āsāñ ho jaa.e

tamannā meñ tirī miT jaa.e dil haañ ye to mumkin hai
mire dil se miTe terī tamannā ho nahīñ saktā