Tags-Tamanna

nigah-e-dost meñ tauqīr nahīñ us kī hamīd
vo tamannā jo munājāt se aage na baḌhī

abhī zinda huuñ lekin sochtā rahtā huuñ ḳhalvat meñ
ki ab tak kis tamannā ke sahāre jī liyā maiñ ne

har shaam sajā.e haiñ tamannā ke nasheman
har sub.h mai-e-talḳhī-e-ayyām bhī pī hai

havā-e-shām se kitne charāġh jal uTThe
dayār-e-dil meñ tamannā kā ik sharar bhī nahīñ

dekhiye kis ke lage haath tirā gauhar-e-vasl
is tamannā meñ to phirte haiñ talabgār bahut

kuchh tamannā se baḌh kar bhī paayā magar
aarzū ek sab se baḌī hai abhī

ruḳh-o-zulf kī tamannā mire dil ko muzhda-bādā
mirī sub.h ban ke aa.ī mirī shaam ban ke aa.ī

agar baḳht-e-rasā ne rahbarī kī terī ḳhalvat tak
to phir dast-e-tamannā rehn-e-dāmān-e-qabā kyuuñ ho

diid kī tamannā meñ aañkh bhar ke ro.e the
ham bhī ek chehre ko yaad kar ke ro.e the

añdheroñ meñ bhaTaktī hai javānī raushnī kaisī
ye kyā manzil hai mahrūm-e-tamannā ho ga.e ham tum

ḳhud apnī soch ke panchhī na apne bas meñ rahe
khulī fazā kī tamannā thī aur qafas meñ rahe

kiyā hai ḳhūn-e-tamannā ne surḳh-rū kyā kyā
tamām kaam huā arz-e-nā-tamām ke ba.ad

ek ehsān hai qudrat kī jafā-kārī par
us kī duniyā meñ bhī jiine kī tamannā karnā

vo aa.e the pahlū meñ behosh thā maiñ huī hogī dil par bahut kuchh navāzish
magar kyā ḳhabar mujh ko allāh jaane tamannā nikālī ki kāñTā nikālā

churā le gayā koī dil bhī jigar bhī uḌā le gayā koī sabr-o-sukūñ bhī
yaqīñ hai tamannā nikalte nikalte nikal jā.egā āshiqoñ kā divālā

ham ko ḳhud arz-e-tamannā kā salīqa bhī na thā
vo bhī 'tanvīr' bhalā uzr-e-jafā kyā karte

aa mere jahāñ meñ mirī duniyā kī tamannā
ab merī murādoñ kā jahāñ zer-o-zabar hai

ye rāh-e-tamannā hai yahāñ dekh ke chalnā
is raah meñ sar milte haiñ patthar nahīñ miltā

zamāna kahtā hai hañgāma-e-hayāt jise
mire hujūm-e-tamannā kā isti.āra hai

dil se āḳhir charāġh-e-vasl bujhā
kyā tamannā ne intiqām liyā