Tags-Tamanna

terī mahbūb nigāhoñ kā payām-e-tajdīd
ik talāfī hī sahī merī tamannā to nahīñ

ye patthar kī na ho jaa.eñ kahīñ aqlīm-e-hastī meñ
rakhe mahfūz āshob-e-tamannā se ḳhudā āñkheñ

kuchh ehtirām bhī kar ġham kī vaz.a-dārī kā
girāñ hai arz-e-tamannā to baar baar na kar

chāhat armāñ aarzū ḳhvāhish tamannā
ik balā ke naam kitne ḳhūbsūrat

jalva-e-husn-e-tamannā hai unheñ aks-e-jamāl
jo sarāboñ meñ haiñ sahrā ke giraftār ai dil

noch liye har shāḳh se patte buuTā buuTā luuT liyā
dast-e-ḳhizāñ ne chorī chorī bāġh-e-tamannā luuT liyā

dil ko thā hausla-e-arz-e-tamannā so unheñ
sarguzisht-e-shab-e-hijrāñ bhī sunā.ī na ga.ī

maslūb huā koī sar-e-rāh-e-tamannā
āvāz-e-jaras pichhle pahar tez bahut hai

sabza-zāroñ kī tamannā mujh meñ sargarm-e-safar safar
chilchilātī dhuup ke nāma-baroñ ke saath maiñ

gesū ġhubār-e-rāh-e-tamannā se aT na jaa.eñ
sahrā meñ aap nikle haiñ ham ko pukārne

rahīn-e-marg-e-tamannā thī kāmrānī-e-vasl
jhulas gayā hai mujhe qurb-e-sho.ala-e-ruḳhsār

apnī taqdīr kā shikva nahīñ likhkhā maiñ ne
ḳhud ko mahrūm-e-tamannā nahīñ likhkhā maiñ ne

nahīñ kuchh aur paane kī tamannā
ġhanīmat hai yahāñ paayā hai jo kuchh

kuchh shorisheñ taġhāful-e-pinhāñ meñ thiiñ jinheñ
hañgāma-zār-e-hashr-e-tamannā banā diyā

kahāñ vo daaġh ki dil kā gumāñ kare koī
samjhiye ahd-e-tamannā kī yādgār kise

ek muddat se tamannā bhī thī masrūf-e-riyāz
naġhma-e-qalb ko ab saaz pe gaayā jaa.e

milā na jab koī autār mujh ko kal-yug meñ
na.e janam kī tamannā meñ ḳhud-kushī kar lī

yahī nahīñ ki sitāre the dastaras se ba.iid
zarā zarā se tamannā bhī Tālte guzrī

jis ġham se dil ko rāhat ho us ġham kā mudāvā kyā ma.anī
jab fitrat tūfānī Thahrī sāhil kī tamannā kyā ma.anī

tum ḳhūn-e-tamannā ko mire laakh chhupāo
ik roz zamāne ko ḳhabar ho ke rahegī