Tags-Tamanna

dil ko mamnūn-e-tamannā na karo
yahī achchhā hai ki achchhā na karo

ek ummīd se dil bahaltā rahā
ik tamannā satātī rahī raat bhar

bas ek tamannā ho jis ke dil-e-vīrāñ meñ
socho to zarā kitne nāzoñ kī palī hogī

raat bhar jis kī tamannā meñ jale haiñ ham log
vo sahar shaiḳh kī nazroñ meñ hai kuffār kī baat

yahī to ek tamannā hai is musāfir kī
jo tum nahīñ to safar meñ tumhārā pyaar chale

ḳhud se milne kī tamannā par zavāl aane ke baad
vo samajhtā hai ki us kā aa.ina bhī maiñ hī thā

sukūt-e-shab toḌne kī ḳhātir bhī koī hañgāma saath rakhnā
na shaam hote hī har tamannā ko qaid-ḳhāne maiñ Daal denā

dil-e-āshiq meñ hasrat bhī hai armāñ bhī tamannā bhī
vo jis bastī meñ rahte haiñ baḌī ābād bastī hai

nigāhoñ se milātā huuñ nigāheñ is tamannā meñ
vo mere dil meñ aa jaa.e jo un āñkhoñ meñ mastī hai

āshiqī sabr-talab aur tamannā betāb
dil kā kyā rañg karūñ ḳhūn-e-jigar hote tak

vahīñ kahīñ na paḌī ho tamannā jiine kī
phir ek baar unhīñ jañgaloñ meñ jā dekhūñ

ik tamannā hai ḳhamoshī ke kaTahre kitne
dil kī dahlīz pe ehsās ke pahre kitne

haath phailā.e the tum ne mujh ko tanhā dekh kar
ab ḳhafā hote ho kyuuñ zaḳhm-e-tamannā dekh kar

miltā nahīñ hai naḳhl-e-tamannā se yaañ samar
phir koī kis umiid pe is jā lagā.e baaġh

dil se milne kī tamannā hī nahīñ jab dil meñ
haath se haath milāne kī zarūrat kyā hai

har tamannā dil se ruḳhsat ho ga.ī
ab to aa jā ab to ḳhalvat ho ga.ī

bahr-etamannā se 'rāhī' aa.ī hai sadā-e-ġharqābī
dil kā safīna Duub rahā ho aisā bhī ho saktā hai

vahī hayāt jo nairañg-e-ḳhār-o-gul hai kabhī
kabhī khilā.e tamannā hai jo na dasht na baaġh

mudda.ā likkheñ talab likkheñ tamannā likkheñ
itnā kuchh likh ke bhī ham ḳhat ko adhūrā likkheñ

dekhtā huuñ use thī jis kī tamannā mujh ko
aaj bedārī meñ hai ḳhvāb-e-zuleḳhā mujh ko