Tags-Tamanna

kufr-o-īmāñ se hai kyā bahs ik tamannā chāhiye
haath meñ tasbīh ho yā dosh par zunnār ho

gar us qad-e-mauzūñ kā tamannā meñ asar hai
barjasta mirī bātoñ kā dīvān banegā

banñe kī tamannā rakhte haiñ
miTne kā kaleja rakhte haiñ

agar ham na un kī tamannā kareñ
to vo ham pe kyuuñ naaz bejā kareñ

hairāñ haiñ nigāheñ dil be-ḳhud mahjūb hai husn-e-be-parvā
ab arz-e-tamannā kis se ho ab arz-e-tamannā kaun kare

har saañs hai sharh-e-nākāmī phir ishq ko rusvā kaun kare
takmīl-e-vafā hai miT jaanā jiine kī tamannā kaun kare

yā mom ban ke ḳhud ko havādis meñ Dhāliye
yā sañg se sharār-e-tamannā nikāliye

kahīñ khiñchā rahā duniyā se misl-e-dast-e-faqīr
misāl-e-dast-e-tamannā kahīñ baḌhā huā maiñ

dil-e-nādān tujh ko kyā kahūñ tū
usī kī phir tamannā kar rahā hai

tumheñ ḳhvāhish ko chhūne kī tamannā hai
ḳhvāhisheñ to uḌtī-phirtī titliyāñ haiñ

ham ko hamārī mahrūmī kī qīmat miltī rahtī hai
dil meñ hamāre baḌh jaatā hai roz ik zaḳhm tamannā kā

sa.i-e-ahbāb ko nāhaq hai rihā.ī kā ḳhayāl
aur hī kuchh hai tamannā tire zindānī kī

rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

kaT ga.ī umr yahī ek tamannā karte
sāmne baiTh ke ham aap ko dekhā karte

guzarte dauḌte lamhe hisāb meñ likhiye
haqīqatoñ kī tamannā bhī ḳhvāb meñ likhiye

kyoñ na anjām-e-tamannā se sañvar jaa.e dil
ishq kī raah meñ kab ḳhūn-e-tamannā na huā

tū mujh ko bhūlnā chāhe to bhuul saktā hai
maiñ ek harf-e-tamannā tirī kitāb meñ huuñ

bahr-e-har-zarf-e-imtihāñ sāġhar
har tamannā kā intiḳhāb sharāb

thā dāġh-e-tamannā rūh-shikan kuchh himmat-e-ġham kaam aa hī ga.ī
dil meñ to baḌe tūfān uThe aañsū na bahe mātam na huā

ye to ma.alūm hai bīmār meñ kyā rakkhā hai
tere milne kī tamannā ne jilā rakkhā hai