Tags-Tasawwur

shukr-e-allah sarv-e-rānā ke tasavvur ke tufail
rafta rafta dil mirā bāġh-e-iram hone lagā

itnī hai mashq-e-tasavvur intizār-e-qatl meñ
mardumak hai aañkh meñ jauhar tirī shamshīr kā

yuuñ kākul-o-ruḳh apne tasavvur meñ haiñ 'jumbish'
ik marhala-e-shām-o-sahar dekh rahā huuñ

merī jaañ maiñ kyā karūñgā kuchh batā
jab tasavvur raat bhar taḌpā.egā

terā aanā thā tasavvur meñ tamāshā sham.a-rū
mere dil par raat parvānoñ kā balvā ho gayā

kabhī jo us ko tasavvur meñ lā ke dekh liyā
har ik ḳhayāl mirā gulsitān ban baiThā

tirī yādoñ ke añgāroñ ko aksar
tasavvur ke laboñ se chūmtā huuñ

had-e-imkān-e-tasavvur meñ sahī merā surāġh
lekin ai dil mujhe ab DhūñDhnā āsāñ bhī nahīñ

maiñ rūh-e-tagore tere dar par aqīdat-e-sar jhukā rahā huuñ
tire tasavvur meñ naġhma-zan huuñ maiñ terī hī lai meñ gā rahā huuñ

kiyā thā raat tasavvur meñ jis ne qasd-e-farār
vo sub.h pā-ba-girafta sahar kī qaid meñ thā

dil kī galiyoñ se tasavvur kī hasīñ vaadī se
jab koī ruuTh ke jaatā hai to ro lete haiñ

musavvir apne tasavvur kā DhūñDhtā hai davām
na jām-e-jam na visāl-e-sanam na shohrat-o-nām

usī se mere rag-o-pai meñ ātish-e-sayyāl
usī se mere tasavvur ke ḳham meñ māh-e-tamām

us kināre kā tasavvur meñ bhī aanā hai muhāl
thā to pahle se samundar be-karāñ aisā na thā

tasavvur ḳhāna-ābādī karegā
tire ghar maiñ rahūñgā mere ghar tū

jab sub.h kā manzar hotā hai yā chāñdnī-rāteñ hotī haiñ
us vaqt tasavvur meñ un se kuchh aur hī bāteñ hotī haiñ

garche halkā sā dhuñdlakā hai tasavvur bhī tirā
band āñkhoñ ko ye manzar bhī bahut lagtā hai

haath rakh detā hai shāne pe tasavvur un kā
ġham kī rātoñ meñ koī jalva-figan hai ki jo thā

mire tasavvur kī nīlgūñ jhiil meñ ek taarā jahāñ girā thā
vahāñ ḳhamoshī balā-e-jāñ hai na koī aahaT na koī halchal