Tags-Tasawwur

ham rātoñ ko uTh kar rote haiñ ro ro ke duā.eñ karte haiñ
ā.ankhoñ meñ tasavvur dil meñ ḳhalish sar dhunte haiñ aa.heñ bharte haiñ

maiñ aur daur-e-sāġhar-o-mīnā hai in dinoñ
āñkheñ haiñ aur tasavvur-e-jānāñ hai āj-kal

tasavvur meñ Tahalte ḳhāl-o-ḳhad kyā chāhte haiñ
udāsī se kaho tasvīr kī āñkhoñ se pūchhe

koī chaudhvīñ-rāt kā chāñd ban kar tumhāre tasavvur meñ aayā to hogā
kisī se to kī hogī tum ne mohabbat kisī ko gale se lagāyā to hogā

tasavvur jānib-e-dil chāhiye majnūñ tujhe karnā
tū jis lailā kā āshiq hai vo is mahmil se niklegī

mirā zauq-e-nazar ho yā tirā faiz-e-tasavvur ho
mire ā.īne meñ aksar tirī tasvīr hotī hai

mirā ḳhvāb-ul-azīz o ġhairat-e-ḳhvāb-e-zuleḳhā hai
tasavvur raat bhar thā mujh ko ik yūsuf-shamā.il kā

kafan misl-e-katāñ hai TukḌe TukḌe 'arsh' madfan meñ
tasavvur mar ga.e par bhī hai ye us māh-e-kāmil kā

rañg bharte haiñ vafā kā jo tasavvur meñ tire
tujh se achchhī tirī tasvīr banā lete haiñ

ajiib shai hai tasavvur kī kār-farmā.ī
hazār mahfil-e-rañgīñ sharīk-e-tanhā.ī

hai tasavvur mujhe har dam tirī yaktā.ī kā
mashġhala aaTh pahar hai yahī tanhā.ī kā

kaTī tasavvur-e-hūrān-e-ḳhuld meñ jin kī
hamāre un ke bhalā kyā vo tasfiya karte

ik sher jaane kis ke tasavvur meñ kah diyā
barsoñ pukārtā rahā merā hunar mujhe

hazāroñ is meñ rahne ke liye aa.e
makāñ maiñ ne tasavvur meñ banāyā thā

yuuñ pā rahā huuñ us kā tasavvur ḳhayāl meñ
ik shaan hai ki mahv hai apne jamāl meñ

nasīm-e-sub.h-e-tasavvur ye kis taraf se chalī
ki mere dil meñ chaman darkinār aatī hai

chaudhvīñ kā chāñd hotā hai daraḳhshāñ jis tarah
yuuñ tasavvur meñ kisī ko jagmagātā dekhte

dekhā kisī ne auj-e-tasavvur na auj-e-fan
pinhāñ thā dāġh-e-aib to sab kī nazar ga.ī

agar talab ho kabhī chand ghūñT paanī kī
samundaroñ kā tasavvur nazar meñ rakkhā jaa.e

azal se āshnā hai dil tire jalvoñ se ai hamdam
tasavvur meñ tirī tasvīr thī tasvīr se pahle