Tags-Tasawwur

ek mauhūm tasavvur ke liye
ruuh kī aab gañvā dī ham ne

jab bhī to mere tasavvur meñ makīñ hotā hai
dil kī duniyā tire jalvoñ se sajī hotī hai

vo duur ek Tiile pe āñchal sā jhalkā
tasavvur meñ lākhoñ diye jhilmilā.e

zaḳhm-e-dil jaag uThe phir vahī din yaar aa.e
phir tasavvur pe ubhar aa.e vo manzar saare

us ke badan ke sīmīñ-pan kā ek tasavvur thā ki achānak
lams ne baḌh kar Thokar khaa.ī chāñd chamak kar Duub gayā

ḳhayāl-e-dahan ne kiyā tañg mujh ko
kamar ke tasavvur ne lāġhar banāyā

vo tasavvur se na jaa.eñ jaan jaa.e yaar hai
mujh ko ye bhī be-ḳhudī-e-ishq meñ manzūr hai

tamām husn-e-jahāñ nā-tamām hai ki nahīñ
ye apsarā kā tasavvur ye jal-parī kyā hai

guzāre maiñ ne jo lamhāt āġhosh-e-tasavvur meñ
vo merī zindagī ke roz-o-shab meñ behtarīñ nikle

jis tasavvur se charāġhāñ hai sar-e-jāda-e-zīst
us tasavvur kī hazīmat kā gunahgār banūñ

aisī ḳhushiyāñ to kitāboñ meñ mileñgī shāyad
ḳhatm ab ghar kā tasavvur hai makāñ baaqī hai

jachte nahīñ nazroñ meñ mah-o-mehr ke jalve
rahtā hai tasavvur sahar-o-shām tumhārā

lete haiñ ahl-e-junūñ kyā kyā tasavvur ke maze
aañkh se pariyoñ ko dekhā bār-hā achchhī tarah

tasavvur meñ na jaane aa gayā hai kis kā chehra
tabī.at aaj lalchā.ī huī sī lag rahī hai

jis kī yādoñ ke diye ham ne bujhā rakkhe haiñ
phir vahī shaḳhs tasavvur meñ utartā kyuuñ hai

'jalālī' jāda-e-ulfat meñ jab se hai qadam rakkhā
rahī un ke tasavvur meñ hamesha bekalī mujh ko

gudgudātā hai tasavvur chuTkiyāñ letā hai dard
kyā kisī be-ḳhvāb kī āñkhoñ meñ ḳhvāb aane ko hai

haiñ tasavvur meñ tire jalve tirī ra.anā.iyāñ
raunaq-e-sad-anjuman hai aaj vīrāna mirā

vo anjuman kā tasavvur kare to kaise kare
jise nasīb na ho kuchh bhī ḳhalvatoñ ke sivā