Tags-Tasawwur

tajraba jo bhī hai merā maiñ vahī likhtā huuñ
maiñ tasavvur ke bharose pe nahīñ baiThā huuñ

merī surḳhī-e-tasavvur se haiñ kyuuñ nārāz aap
kyā harā peḌ aap tak bhī phuul le kar aa.egā

sab karishmāt-e-tasavvur haiñ 'shakīl'
varna aatā hai na jaatā hai koī

mujhe dekho tasavvur kī nazar se
tumhārī zaat meñ utrā huā huuñ

tasavvur fil-haqīqat mo.ajiza hai
kisī kā dil pe saaya paḌ rahā hai

pare hai aaj bhī vo sarhad-e-tasavvur se
maiñ us ko puuj to saktā huuñ pā nahīñ saktā

jab tasavvur meñ na pā.eñge tumheñ
phir kahāñ DhūñDne jā.eñge tumheñ

haiñ tasavvur meñ us ke āñkheñ band
log jāneñ haiñ ḳhvāb kartā huuñ

us ko tasavvur tak laane meñ aap hī kho jaate haiñ ham
ḳhud hī phañs jaate haiñ ham aur ḳhud hī jaal banāte haiñ

haiñ jis kī diid se mahrūm aaj tak 'ḳhāvar'
usī kī ham ne tasavvur meñ bandagī kī hai

tasavvur ne tire ābād jab se ghar kiyā merā
nikaltā hī nahīñ din raat apne ghar meñ rahtā hai

jo nazar guzrī hai tapte hue nazzāroñ se
kyā tasavvur kī ghanī chhāñv meñ so jā.egī

kabhī tasavvur-e-jānāñ kabhī tasallī-e-dil
tumhārī yaad se ḳhālī kabhī rahā na gayā

ye sharm ke ma.anī haiñ hayā kahte haiñ is ko
āġhosh-e-tasavvur meñ na aayā badan un kā

kyā karūñ husn kā tasavvur ab
tere chehre pe jab naqāb nahīñ

phir adh-khulā sā koī darīcha mire tasavvur pe chhā rahā hai
ye khoyā khoyā sā chāñd jaise tirī kahānī sunā rahā hai

kabhī to ham haiñ yahāñ vahāñ ke kabhī tasavvur idhar udhar kā
sukūn-o-rāhat se kyā ta.alluq ki bad-gumānī hai aur ham haiñ

kuchh nazar aatā nahīñ us ke tasavvur ke sivā
hasrat-e-dīdār ne āñkhoñ ko andhā kar diyā

ik nayā ḳhauf buḌhāpe kā tasavvur ban kar
khaTkhaTātā hai mire zehn ke darvāzoñ ko

judā.ī kā tasavvur saath rakhnā
mohabbat meñ judā.ī lāzmī hai