Tags-Tasawwur

us sharam-gīñ nazar kā tasavvur agar 'shamīm'
bijlī dil-o-nazar par girā.e to kyā karūñ

kal talak jo thā tasavvur anjuman-ārā.iyoñ kā
vo muqaddar ban gayā hai ab mirī tanhā.iyoñ kā

haiñ us ke tasavvur ko ghere hue armāñ sab
rahtā hai faqīroñ meñ sultān mohabbat kā

raunaq hai mire ghar meñ tasavvur hī se jis ke
vo kaun thā 'rāhī' dar-o-dīvār se pūchho

kal tasavvur meñ aa.ī jo shab-e-gor
shab-e-furqat se vo muhīb nahīñ

mire tasavvur ke rāstoñ meñ ubhar ke Duubī hazār aahaT
na jaane shām-e-alam se mil kar kahāñ saverā palaT gayā hai

is rū-e-ātishīñ ke tasavvur meñ yād-e-zulf
yaanī ġhazab hai aag lage aur havā chale

rotā huuñ maiñ tasavvur-e-zulf-e-siyāh meñ
paanī baras rahā hai jame haiñ ghaTā ke rañg

ho ga.e paar ham tasavvur meñ
naav chaltī rahī nadī ke baġhair

rahguzar meñ yaksūī anjuman meñ tanhā.ī
ham tire tasavvur meñ the kahāñ kahāñ tanhā

bas gayā mere tasavvur meñ hayūlā terā
zehn-e-shā.ir meñ koī yaad suhānī jaise

hamesha uḌte haiñ taa.ir tire tasavvur ke
kabhī to zehn se fikr-e-suḳhan utaar ke aa

mazāq-e-dil-barī hai ishq ke paiġhām se vāqif
tasavvur hai mirā khoyā huā sā terī āñkhoñ meñ

vo tasavvur ke jaal meñ uljhā
dhuñdh sā ik udaas chehra thā

tasavvur meñ khiñchā naqsha hai un ke rū-e-rañgīñ kā
ba-zāhir parda-e-dil meñ haiñ 'afqar' vo nihāñ ham se

badal ke rakh deñge ye tasavvur ki aadmī kā vaqār kyā hai
ḳhalā meñ vo chāñd nāchtā hai zamāñ makāñ kā hisār kyā hai

khul nahīñ saktī haiñ ab āñkheñ mirī
jī meñ ye kis kā tasavvur aa gayā

ye tasavvur-e-rihā.ī rahe kyuuñ nazar meñ 'gauhar'
mujhe qaid karne vaale mire bāl-o-par jalā de

tasavvur kījiye us aane vaale daur-e-barham kā
gadā toḌeñge jab pindār-e-shāhāna to kyā hogā

paañv lag jaa.eñ tasavvur ko to ham chal nikleñ
ham ko ḳhvāboñ kī guzargah se pukārā kis ne