Tags-Tasawwur

uThāyā maiñ ne shām-e-hijr lutf-e-guftugū kyā kyā
tasavvur ne tirī tasvīr ke muñh meñ zabāñ rakh dī

jam jaa.e tasavvur jo tire buuTe se qad kā
pathrā ke bane saaf aqīq-e-shajarī aañkh

aañsū nikal rahe haiñ tasavvur meñ ban ke phuul
shādāb ho rahā hai gulistān-e-ārzū!

ḳhabar tasavvur ḳhayāl īmāñ gumāñ yaqīñ fikr ilm hikmat
maqām-e-ḳhud-āgahī ke aage savād-e-kam-āgahī kī sūrat

jis kī tasvīr-e-tasavvur zehn meñ mahfūz hai
jāda-e-ulfat meñ us ko DhūñDhnā achchhā lagā

ye kis ke tasavvur meñ ai jān-e-armāñ
tujhe bhī sar-e-bazm haal aa rahā hai

kabhī jo āñkhoñ ke aa gayā āftāb aage
tire tasavvur meñ ham ne kar lī kitāb aage

bichhaunā kāñToñ kā hai phir bhī aa.ī jaatī hai niiñd
abhī tasavvur-e-zānū-e-yār baaqī hai

rū-ba-rū chashm-e-tasavvur ke vo har vaqt rahe
na sahī aañkh ne gar un kā nazārā na kiyā

aa aur mirī chashm-e-tasavvur meñ samā jā
ā.īna tirā der se be-aks paḌā hai

ek dhundlā sā tasavvur hai ki dil bhī thā yahāñ
ab to siine meñ faqat ik Tiis sī paatā huuñ maiñ

maiñ jān-o-dil se tasavvur-e-husn-e-dost kī mastiyoñ ke qurbāñ
jo ik nazar meñ kisī ke be-kaif āñsuoñ ko sharāb kar de

bikhertā hī rahā nuur vo shab-e-ġham meñ
jo māhtāb tasavvur ke āsmāñ kā thā

numāyāñ ho chalā hai ik jahāñ chashm-e-tasavvur par
nazar shāyad harīf-e-sāġhar-e-jam hotī jaatī hai

dil-e-vārufta-e-dīdār kī allāh re mahviyyat
tasavvur meñ tire vo terī sūrat bhuul jaatā hai

yuuñ tasavvur meñ basar raat kiyā karte the
lab na khulte the magar baat kiyā karte the

tasavvur meñ tumhārā saath pā kar
lo apne hosh kho baiThā hai pāgal

tasavvur meñ visāl-e-yār ke sāmān hote haiñ
hameñ bhī yaad haiñ hasrat kī bazm-ārā.īyāñ kyā-kyā

maazī meñ jo mazā mirī shām-o-sahar meñ thā
ab vo faqat tasavvur-e-shām-o-sahar meñ hai

sajī huī hai sitāroñ se mai-kade kī fazā
ki raat tere tasavvur meñ Dhal ke aa.ī hai