Tags-Tauba

kyuuñ na TuuTe mirī tauba jo kahe tū saaqī
pī le pī le are ghanghor ghaTā chhā.ī hai

karūñ tauba jo ho paidā bun-e-har-mū se zabāñ
jitne haiñ mū-e-badan utnī hī taqsīreñ haiñ

tauba khaḌī hai dar pe jo fariyād ke liye
ye mai-kada bhī kyā kisī qaazī kā ghar huā

tauba kā yahī vaqt hai kyā soch rahe ho
sajde meñ jabīnoñ ko jhukā kyuuñ nahīñ dete

huur par merī tabī.at aa.e kyā maqdūr hai
tauba tauba ye bhī terī tarah harjā.ī huī

shauq piine kā mujh ko ziyāda na thā tark-e-tauba kā koī irāda na thā
maiñ sharābī nahīñ mujh ko tohmat na do vo nazar se pilā.e to maiñ kyā karūñ

sūr-o-mansūr-o-tūr are tauba
ek hai terī baat kā andāz

na dekhūñgā hasīnoñ ko are tauba na dekhūñgā
taqāzā laakh tū kar ai dil-e-shaidā na dekhūñgā

ise kaheñ haiñ sunā hogā shaiḳh ḳhauf o rajā
udhar tū tauba idhar maiñ gunāh kartā huuñ

guzar gayā hai zamāna magar mujhe 'rif.at'
hai ab bhī yaad kisī kī nigāh-e-tauba-shikan

ġhurūr-e-jism pe aur jaan pe are tauba
na jaane miTTī kā putlā ye kis gumān meñ hai

mai-kade meñ tauba kā kis ko hosh rahtā hai
aur har nazar terī jab sharāb ho jaa.e

pārsā.ī kī javāñ-margī na pūchh
tauba karnī thī ki badlī chhā ga.ī

insān jīte-jī kareñ tauba ḳhatāoñ se
majbūriyoñ ne kitne farishte banā.e haiñ

guzre haiñ mai-kade se jo tauba ke ba.ad ham
kuchh duur ādatan bhī qadam laḌkhaḌā.e haiñ

ārizoñ par ye Dhalakte hue aañsū tauba
ham ne sho.aloñ pe machaltī huī shabnam dekhī

aaj pahlī baar tauba kā irāda ho rahā hai
shaiḳh-sāhib aaj ham ko mai-kade le jā rahe haiñ

yaar bin 'aish' mai-kashī tauba
hai ye apne ḳhilāf maz.hab ke

kar bulbul o tā.ūs kī taqlīd se tauba
bulbul faqat āvāz hai tā.ūs faqat rañg

tauba ke taqaddus kā qaa.il to huuñ maiñ lekin
paimāna baḌhā denā jab abr-e-bahār aa.e