Tags-Tauba

zamīr kī vo musalsal malāmateñ tauba
milā hai dil ko sakūñ ashk-e-infi.āl ke ba.ad

taḌap kar maiñ ne tauba toḌ Daalī
tirī rahmat pe ilzām aa rahā thā

ka.abe meñ mujh se shān-e-butāñ pūchhte ho shaiḳh
tauba meñ un kā zikr karūñgā ḳhudā ke ba.ad

tauba karne pe bhī itnā hai ilāqa baaqī
duur se dekh liyā karte haiñ mai-ḳhāne ko

tauba tauba kyā ġhazab saaqī kī ġhaflat ne kiyā
sab kī sūrat dekhtā huuñ riñd-e-be-zar kī tarah

tauba tire dāman pe junūñ-ḳhez nigāheñ
huuñ to magar ab itnā bhī dīvāna nahīñ huuñ

aisoñ se tark-e-mai kā 'mubārak' savāl kyā
tauba kī tujh se rind-e-qadah-ḳhvār kyā kaheñ

vo mai-kash huuñ ki aatā hai jo lab par naam tauba kā
to mujh par josh meñ aa kar ghaTā kyā kyā barastī hai

tauba bhī bhuul ga.e ishq meñ vo maar paḌī
aise ausān ga.e haiñ ki ḳhudā yaad nahīñ

tauba tauba tauba haa.e
ishq baḌā man-mānī hai

ba.ad-azīñ mohtasib qasam le le
tauba kartā huuñ lā shitāb sharāb

nāseh hamārī tauba meñ kuchh shak nahīñ magar
shāna hilā.eñ aa ke ghaTā.eñ to kyā kareñ

tabarruk the mirī tauba ke TukḌe
bajā.e naql mahfil meñ baTe haiñ

yahī 'jāved' behtar hai ki ab tauba se kar tauba
vahī chhup kar piyegā mai jo tum sā pārsā hogā

un ke ruḳhsār pe Dhalke hue aañsū tauba
maiñ ne shabnam ko bhī sho.aloñ pe machalte dekhā

ye marhala-hā-e-shauq tauba tauba
is umr meñ tai karegā insāñ kyā kyā

hamārī tauba kā ḳhuuñ hai ki bāda-e-rañgīñ
ye jaam jaam meñ kyā laal laal rakkhā hai

pilā sāqiyā mai-ḳhunuk aab meñ
ki thamtī nahīñ tauba mahtāb meñ

haqīqat meñ vo ā.īna-sifat insān hotā hai
ki tauba kar ke bhī jis kī pashemānī nahīñ jaatī

is qadar Duube gunāh-e-ishq meñ tere habīb
sochte haiñ jā.eñge kis muñh se tauba kī taraf