Tags-Tauba

naqd-e-ta.alluq ḳhuub kamāyā lekin ḳharch are tauba
ye to batāo kal kī ḳhātir kyā kuchh pas-andāz kiyā

tauba tauba nā-ummīdī kī ḳhayāl-ārā.iyāñ
dekhte hoñ jaise ḳhud lalchā ke paimāne mujhe

vaise to irāda nahīñ tauba-shikanī kā
lekin abhī TuuTe hue sāġhar nahīñ pheñke

ab irādoñ pe bharosa hai na tauba pe yaqīñ
mujh ko le jaa.e kahāñ tishna-labī shaam ke ba.ad

ḳhud-kushī shiddat-e-īzā-e-vafā meñ tauba
buzdilī kahiye ise ye hal-e-mushkil na huā

haiñ tañg tirī mai-kash saaqī ye paḌh ke namāz aatā hai yahīñ
yā shaiḳh kī tauba tuḌvā de yā vaqt badal maiḳhāne kā

tauba kī nāzishoñ pe sitam Dhā ke pī gayā
''pī''! us ne jab kahā to maiñ ghabrā ke pī gayā

baḌī dil-ḳharāsh sadā thī vo ki binā-e-mai-kada hil ga.ī
ye shikast-e-tauba hai dekhtā ki shikasta-e-shīsha-o-jām hai

allāh allāh kyā huā anjām-kār-e-ārzū
tauba tauba kis qadar hañgāma-ārā.ī huī

ġhusl-e-tauba ke liye bhī nahīñ miltī hai sharāb
ab hameñ pyaas lagī hai to koī jaam nahīñ

muñh bhī dekhā nahīñ maiñ ne kabhī mai-ḳhāne kā
tauba tauba mujhe tauba kī zarūrat kyā hai

guzre yūñhī to tauba ke din ab sivā piyūñ
saaqī zarā talāfī-e-māfāt bhī to ho

chashm-e-sāqī kī tarah hai asar-andāz ai shaiḳh
ba.ad tauba ke chhalaknā bhare paimānoñ kā

'shamīm' is daur kā ye sañg-dil insāñ are tauba
ki jis se ehtirām-e-shīsha-e-dil ho nahīñ saktā

jaam hai tauba-shikan tauba mirī jām-shikan
sāmne Dher haiñ TuuTe hue paimānoñ ke

vaa.iz abas ye zikr-e-azāb-e-shadīd hai
ik tauba qufl-e-rahmat-e-haq kī kalīd hai

tahārat-e-zāhirī se hāsil na ho sakegī safā-e-bātin
bahā ke ham ḳhūn-e-tauba 'vahshat' usī se ik din vuzū kareñge

ajī tauba is garebāñ kī bhalā bisāt kyā thī
ye kaho ki haath uljhā nahīñ tār-tār hotā

shāyad 'aḳhgar' hī kī tauba kī ḳhabar hai yaaro
aaj saaqī ke ishāroñ ko hañsī aatī hai

shab ko mai ḳhuub sī pī sub.h ko tauba kar lī
riñd ke riñd rahe haath se jannat na ga.ī